MANILA, Philippines — Isang mahalagang hakbang para sa kapakanan ng libu-libong manggagawa sa pamahalaan ang naabot matapos pumasa sa komite ng Mababang Kapulungan ang pinagsama-samang panukalang batas na naglalayong iregular ang mga Job Order (JO) at Contract of Service (COS) workers. Ito ang inihayag ni Kamanggagawa Partylist Rep. Eli San Fernando, na matagal nang nagsusulong ng mas maayos na kalagayan at seguridad sa trabaho para sa mga contractual workers ng gobyerno.

Ayon kay San Fernando, matagal nang suliranin sa burukrasya ang sistemang JO at COS, kung saan maraming manggagawa ang umaabot na sa isa o dalawang dekada sa serbisyo ngunit nananatiling walang regular na katayuan. Aniya, malinaw itong anyo ng pang-aabuso sa kontraktuwalisasyon at nagiging hadlang sa pagkakaroon ng sapat na benepisyo at proteksyon ang mga manggagawa.

“Hindi na makatarungan na ang mga taong matagal nang nagsisilbi sa gobyerno ay patuloy na walang seguridad sa trabaho, walang benepisyo, at madaling tanggalin,” pahayag ng mambabatas. Dagdag pa niya, mahalagang kilalanin ang kontribusyon ng JO at COS workers na nagsisilbing gulugod ng maraming ahensya ng pamahalaan.

Layunin ng panukalang batas na bigyan ng regular na posisyon ang mga kwalipikadong JO at COS workers, kasama ang karapatan sa benepisyo tulad ng leave, insurance, at retirement benefits, alinsunod sa umiiral na mga patakaran ng Civil Service Commission. Nakapaloob din sa panukala ang malinaw na pamantayan upang matiyak na maayos at patas ang proseso ng regularisasyon. Umaasa si Rep. San Fernando na agad itong isusulong sa susunod na antas ng pagtalakay sa Kamara at makakakuha ng malawak na suporta mula sa iba pang mambabatas. Aniya, ang pagsasabatas ng panukalang ito ay hindi lamang tagumpay ng mga manggagawa kundi isang hakbang tungo sa mas makatao at makatarungang serbisyo-publiko sa bansa. (Larawan: Congress)