CEBU, Province — Suspendido pansamantala ang paglulunsad ng 600 electric vehicle (EV) taxi units ng Green & Smart Mobility (GSM) sa Cebu Province matapos ang usapin sa public consultation na gaganapin pagkatapos ng holidays.

Ayon sa Land Transportation Franchising and Regulatory Board (LTFRB), napagkasunduan ang suspensiyon sa pagpupulong nila kasama si Governor Pamela Baricuatro, na noon ay nagbigay-alok sa GSM na ipagpaliban muna ang operasyon at magsagawa ng tunay na konsultasyon sa publiko upang talakayin ang social, economic, at environmental impacts ng EV taxi operations sa lalawigan. Nakatakda ang consultative meeting sa January 5, 2026.

Nilinaw ni Governor Baricuatro sa isang Facebook post na hindi siya tutol sa teknolohiya ng EV o sa mga environmental initiatives, kundi sa paraan ng pag-isyu ng provisional operating licenses. Aniya, ang ganitong hakbang ay maaaring magdulot ng hindi patas na displacement sa kasalukuyang taxi operators na sumusunod sa regulasyon at nagbayad ng kanilang dues.

Binigyang-diin niya ang kahalagahan ng pakikilahok ng mga stakeholder, kabilang ang taxi associations, EV operators, commuters, urban planners, at traffic management authorities, sa isang bukas at inklusibong konsultasyon. “Mahirap na ang trapiko sa Cebu. Ang pagdagdag ng 600 bagong sasakyan, kahit EV, nang walang tamang traffic management ay maaaring magpalala ng congestion, kakulangan sa parking, at mga isyu sa kaligtasan,” ani Baricuatro.

Hinihikayat din ng gobernador ang GSM na makibahagi sa isang konstruktibong review process at nanawagan sa mga kaukulang ahensya na unahin ang transparency, accountability, at pangmatagalang kapakanan ng mga residente at ekonomiya ng Cebu. “Karapatan ng ating mga driver, pasahero, at komunidad na magkaroon ng transport system na ligtas, patas, at sustainable. Mananatili akong nakatutok sa masusing oversight at sa paggawa ng matalinong hakbang na inuuna ang interes ng mamamayan,” dagdag pa niya. (Larawan: Cebu Province / Facebook)