MARAWI CITY — Nasagip ng mga awtoridad ang isang anim na taong gulang na batang babae matapos i-hostage ng isang lalaki sa Barangay Sabala Manao Proper, Marawi City nitong Linggo ng umaga. 

Ayon sa Police Regional Office–Bangsamoro Autonomous Region (PRO-BAR), ang suspek na 28-anyos ay pumasok sa bahay ng biktima, sapilitang kinuha ito, at tinutukan ng kutsilyo sa leeg.

Batay sa ulat, nakilala ang rumespondeng pulis na si Police Senior Master Sergeant Sohair Solaiman mula sa Molunda Municipal Police Station, na noon ay nagdya-jogging sa lugar. Sinubukan niyang makipagnegosasyon sa suspek upang pakawalan ang bata, ngunit naging agresibo ang lalaki. Sa gitna ng tensyon, napilitang gumamit ng pwersa si Solaiman upang mailigtas ang biktima. Napatay ang suspek sa operasyon habang ligtas namang nasagip ang bata.

Ayon sa PRO-BAR, pinaniniwalaang nasa impluwensiya ng ipinagbabawal na gamot ang suspek nang mangyari ang insidente. “The suspect who was believed to be under the influence of illegal substances allegedly entered the victim’s house, took her forcibly, and pointed a knife at her neck,” nakasaad sa opisyal na pahayag ng pulisya.

Samantala, iniulat na naganap ang hostage-taking bandang alas-7:50 ng umaga sa loob ng tinaguriang Ground Zero ng Marawi City. Agad na dinala ang bata sa ospital para sa medikal na pagsusuri at kasalukuyang nasa maayos na kalagayan.

Nagpahayag ng pasasalamat ang pamilya ng biktima sa agarang aksyon ng mga awtoridad. Pinuri rin ng pamunuan ng PRO-BAR ang katapangan ni Solaiman sa pagligtas sa bata. Ang insidente ay nagsilbing paalala sa kahalagahan ng maagap na pagtugon ng mga pulis sa mga sitwasyong nagbabanta sa buhay ng mga sibilyan.