DISYEMBRE 22, 2025 — Patuloy na lumalakas ang indikasyon na ang pagkamatay ni dating Department of Public Works and Highways (DPWH) undersecretary Maria Catalina “Cathy” Cabral ay dulot ng pagpapakamatay, ayon sa Department of the Interior and Local Government (DILG) at Philippine National Police (PNP).

Si Cabral, 63, ay natagpuang wala nang buhay sa isang bangin sa Kennon Road, Tuba, Benguet noong Disyembre 19. Batay sa autopsy, namatay siya dahil sa blunt force trauma matapos mahulog sa matarik na bahagi ng kalsada.

“All signs point to suicide,” pahayag ni Interior Secretary Jonvic Remulla. 

(Lahat ng palatandaan ay tumuturo sa pagpapakamatay.)

Kinumpirma rin ni PNP acting chief Lt. Gen. Jose Melencio Nartatez Jr. na ang ebidensya ay tugma sa suicide. 

“Pieces of evidence we have gathered show that there is a suicide,” aniya. 

(Ang mga ebidensyang nakalap namin ay nagpapakita ng pagpapakamatay.) 

Gayunman, binigyang-diin niyang nagpapatuloy pa ang imbestigasyon.

Si Cabral ay matagal nang opisyal ng DPWH na nagsimula pa noong dekada ’80. Noong 2014, siya’y hinirang na undersecretary para sa Planning and Public-Private Partnership. Ngunit nitong Setyembre, siya’y nagbitiw sa pwesto matapos masangkot sa kontrobersyal na flood control corruption scandal.

Ayon kay Remulla, hindi natatapos sa kanyang kamatayan ang pananagutan ni Cabral. 

“There is no escape from her restitution despite her death,” aniya. 

(Walang takas sa kanyang pagbabayad-pinsala kahit sa kanyang kamatayan.) 

Ipinaliwanag niyang susuriin pa rin ng pamahalaan ang money trail at kung mapatunayang ill-gotten wealth ang mga ari-arian, ito’y kukumpiskahin sa pamamagitan ng civil forfeiture.

Dagdag pa ni Remulla, posibleng matinding pressure mula sa mga kasangkot sa anomalya ang nagtulak kay Cabral sa desperadong hakbang. 

“I think she could live with the crime, the commission of the crime, but she couldn’t live with being caught,” aniya. 

(Sa tingin ko, kaya niyang mabuhay na dala ang krimen, pero hindi niya kayang mabuhay na nahuli siya.)

Habang nagpapatuloy ang imbestigasyon, nananatiling sentro ng usapin ang malawak na katiwalian sa DPWH at ang kapalaran ng mga ari-ariang umano’y nakinabang si Cabral.

(Larawan: Philippine News Agency)