Inanunsyo ng NCAA ang bagong patakaran nitong Huwebes na naglilimita sa pagsali sa women’s sports sa mga atletang ipinanganak na babae.  

Ang desisyong ito ay kasunod ng executive order ni Pangulong Donald Trump, na naglalayong ipagbawal ang transgender athletes sa girls’ at women’s sports. Pinapayagan ng kautusan ang mga pederal na ahensya na putulin ang pondo ng mga organisasyong hindi sumusunod sa Title IX, alinsunod sa interpretasyon ng administrasyon na ang kasarian ay batay sa kapanganakan. 

Agad na ipapatupad ang bagong patakaran sa lahat ng atleta, anuman ang kanilang dating eligibility status. Bilang pinakamalaking organisasyon ng collegiate sports sa U.S., mayroong higit sa 1,100 miyembrong paaralan at 500,000 atleta ang NCAA. 

Binigyang-diin ni NCAA President Charlie Baker ang pangangailangan para sa malinaw at pare-parehong eligibility standards, aniya, “Ang isang pambansang patakaran na malinaw at pare-pareho ang pinakamabuting paraan upang suportahan ang mga student-athletes, sa halip na iba-ibang batas sa bawat estado. Ang kautusan ni Pangulong Trump ay nagtatakda ng isang malinaw na pambansang pamantayan.” 

Noong 2022, nagpatupad ang NCAA ng isang sport-by-sport approach kung saan sinusunod ang patakaran ng bawat sport’s national governing body sa transgender participation. 

Kung walang pambansang regulasyon, ginagamit ang patakaran ng international federation, at kung wala rin nito, sinusunod ang IOC guidelines. 

Sa nakaraang taon, lalong lumakas ang kritisismo laban sa transgender athletes, kung saan sinasabi ng mga tumututol na ito ay hindi patas at maaaring magdulot ng panganib sa women’s sports. 

Naging isang mahalagang isyu rin ito sa kampanya sa muling pagtakbo ni Trump, sa kabila ng napakakaunting bilang ng transgender athletes sa NCAA. Ayon kay Baker, noong nakaraang taon, alam lamang niya ang sampung transgender athletes na lumalahok sa liga. 

Sa ilalim ng bagong patakaran ng NCAA, ang mga atletang ipinanganak na lalaki ay maaaring mag-ensayo kasama ang women’s teams at makatanggap ng benepisyo gaya ng medical care. Karaniwan na itong ginagawa sa women’s basketball, kung saan ang mga lalaki ay nagsisilbing sparring partners sa ensayo.

Maari namang lumahok sa men’s teams ang sinumang atleta, anuman ang gender identity, basta’t pumasa sa eligibility requirements ng NCAA. Gayunpaman, ang mga atletang ipinanganak na babae ngunit sumasailalim sa hormone therapy tulad ng testosterone ay maaari lamang mag-ensayo kasama ang women’s teams ngunit hindi maaaring makipagkumpetensya nang hindi nalalagay sa alanganin ang eligibility ng kanilang team sa championships. 

Ang mga miyembrong paaralan pa rin ang may pananagutan sa pagsusuri ng eligibility ng mga atleta para sa pagsasanay at kumpetisyon. Idiniin din ng NCAA na ang mga lokal, pang-estado, at pederal na batas ay may higit na bisa kaysa sa kanilang sariling mga patakaran. 

Ang pagbabagong ito sa patakaran ay inanunsyo ilang oras matapos simulan ng administrasyong Trump ang mga imbestigasyon sa posibleng paglabag sa civil rights sa dalawang unibersidad at isang high school sports league na nagpapahintulot sa transgender athletes na makipagkumpetensya sa women’s teams. 

Sa kasalukuyan, sinusuri ng Education Department ang San Jose State University, University of Pennsylvania, at Massachusetts Interscholastic Athletic Association. 

Naging tampok sa balita noong nakaraang season ang women’s volleyball team ng San Jose State matapos lumutang ang hindi kumpirmadong akusasyon na may transgender player sa kanilang roster. 

Samantala, sa Penn, tatlong dating kakampi ni transgender swimmer Lia Thomas ang nagsampa ng kaso laban sa NCAA, Ivy League, Harvard, at sa unibersidad, na nagsasabing nilabag ng kanyang pagsali sa championships ang probisyon ng Title IX. 

Ayon sa NCAA, inatasan ng Board of Governors ang kanilang staff na suportahan ang mga miyembrong paaralan sa pagbuo ng isang inklusibo at respetadong collegiate athletic culture. Kamakailan lamang ay naglabas din ang NCAA ng bagong mental health guidance. 

Ang bagong patakaran ng NCAA ay tumutugma sa regulasyon ng National Association of Intercollegiate Athletics (NAIA), na nangangasiwa sa sports sa 241 maliliit na kolehiyo sa buong bansa. 

Noong Abril, pinagtibay ng NAIA ang isang patakarang nagpapahintulot lamang sa mga atletang ipinanganak na babae at hindi sumailalim sa hormone therapy na makipagkumpetensya sa women’s sports.

Larawan: NCAA