Tagbilaran City, Bohol — Handang-handa na si Regie “The Filipino Phenom” Suganob ng PMI Bohol Boxing Stable na muling patunayan ang kanyang husay sa ibabaw ng lona, sa kanyang pagharap sa Tanzanian boxer na si Mchanja Yohana sa main event ng Kumong Bol-Anon 23 na gaganapin sa Nob­yembre 15 sa Tagbilaran City.

Para kay Suganob, malaking laban ito tungo sa muling pagsabak sa world title. Sa pinakahuling tala ng World Boxing Organization (WBO), bahagyang bumaba siya mula No. 2 patungong No. 4 sa light flyweight rankings.

Kaya’t itinuturing ng kampo ni Suganob na napakahalagang hakbang ang laban na ito upang makabalik sa top contender status sa susunod na taon.

“Gusto naming ipakita na si Regie ay nananatiling isa sa pinakamagagaling sa division. Ang laban na ito ay hindi lamang para sa ranking, kundi para sa kumpiyansa niya bilang mandirigmang Pilipino,” ayon sa representative ng PMI Bohol Boxing Stable.

Hindi magiging madali ang laban, dahil haharapin ni Suganob ang beteranong si Mchanja Yohana, dating WBO Global Flyweight Champion at kasalukuyang No. 8 sa flyweight division ng parehong organisasyon.

Bitbit ni Yohana ang impresibong rekord na 21 panalo (14 via knockout), may anim na talo at isang tabla. Kasalukuyan siyang may pitong sunod-sunod na panalo mula nang matalo kay Milan Melindo ng Pilipinas noong 2023 sa Cebu.

Hindi rin baguhan si Yohana sa mga Pinoy boxers — tinalo rin niya si Miel Fajardo sa pamamagitan ng unanimous decision noong nakaraang taon sa Tanzania.

Samantala, si Suganob ay may rekord na 16 panalo (6 KOs) at isang talo lamang. Kilala siya sa disiplina at tibay ng depensa sa ring, bagay na nagpanatili sa kanya sa hanay ng mga world-rated contenders kahit matapos ang pagkatalo sa kanyang unang world title challenge.

Ayon sa kanyang kampo, determinado si Suganob na ipakita sa home crowd sa Bohol na karapat-dapat pa rin siyang bumalik sa pandaigdigang entablado ng boksing.

larawan/google