Setyembre 19, 2025 - Handa na ang Pilipinas na ipakita ang galing at tibay ng ating mga atleta sa nalalapit na Netflix series na Physical: Asia, kung saan pangungunahan ang koponan ng pambansang kamao at boxing legend na si Manny Pacquiao. Ito ang kauna-unahang nation-vs-nation edition ng sikat na Physical:100 franchise na magtatampok ng mga matitibay at may talento na atleta mula sa iba’t ibang bansa sa Asya at Oceania.

Kasama ni Pacquiao sa Team Philippines ang ilan sa pinaka-prominente at maaasahang atleta ng bansa: sina Mark Mugen, national team sambo athlete; Ray Jefferson Querubin, strongman competitor; Justin Coveney, national rugby player; Robyn Lauren Brown, national hurdler; at Lara Lorraine Deang Liwanag, crossfit athlete. Ang pahayag ng Netflix Philippines ay puno ng pagkasabik: “LFG Team Philippines!!”

Ayon sa Netflix, kabuuang 48 kalahok mula sa walong bansa—Korea, Japan, Thailand, Mongolia, Türkiye, Indonesia, Australia, at Pilipinas—ang maglalaban sa serye. Haharapin nila ang matitinding hamon na susukat sa kanilang lakas, bilis, diskarte, at kakayahang makipagtulungan bilang isang koponan. Hindi lamang pisikal na lakas ang sukatan sa Physical: Asia, kundi pati ang talino at taktika sa bawat laban.

Bukod sa kompetisyon, binibigyang-diin ng streaming platform ang pagpapakita ng kultura at pagkakakilanlan ng bawat bansa. “Physical: Asia is more than a clash of athletes; it’s a showcase of heritage, pride, and physical mastery on an unprecedented global stage,” pahayag ng Netflix. Sa pamamagitan nito, layunin nilang ipakita na ang serye ay hindi lang basta sports show kundi isang pagdiriwang ng kultura, disiplina, at pagmamalaki sa sariling bansa.

Itinatampok din ng palabas ang kakaibang pagsasanib ng pisikal na galing at tradisyon ng bawat bansa. Ang mga manonood ay inaasahang makikita hindi lamang ang kakayahan ng mga atleta kundi pati na rin ang kanilang kwento, pinanggalingan, at dedikasyon sa isport.

Nakatakdang simulan ang streaming ng Physical: Asia ngayong Oktubre sa Netflix, at inaasahang magiging paboritong panoorin ng mga manonood na mahilig sa sports, kompetisyon, at inspirasyon mula sa mga pambansang atleta.

Larawan mula sa Netflix