Puno ng mahahalagang agenda ang Senado ngayong Martes, September 23, 2025, kung saan sabay-sabay na tatalakayin ng iba’t ibang komite ang mga isyu sa korapsyon sa flood control projects, pagpapatupad ng Universal Health Care (UHC) Act, at mga proposed budget ng hudikatura at peace-related agencies.

Unang magsisimula sa ganap na 9:00 a.m. ang pagdinig ng Blue Ribbon Committee na pangungunahan ni Senate President Pro Tempore Panfilo “Ping” Lacson. Motu proprio inquiry ito, in aid of legislation, na may temang “The Philippines Under Water.” Kaugnay ito ng privilege speeches ni Lacson noong August 20 at September 9, 2025, na pinamagatang “Flooded Gates of Corruption” at “Flooded Gates of Hell.” Inaasahang tatalakayin dito ang umano’y korapsyon at kapalpakan sa mga flood control projects. Kalakip din ng imbestigasyon ang speeches nina Sen. Jinggoy Estrada (“No One is Safe,” September 10) at Sen. Erwin Tulfo (“The Philippine Contractors Association Board,” September 16).

Kasabay nito, 10:00 a.m., magdadaos ng budget briefing ang Senate Finance Subcommittee J na pinamumunuan ni Sen. Francis “Kiko” Pangilinan. Nakapokus ang talakayan sa proposed 2026 budget ng Judiciary. Inaasahang pag-uusapan ang mga hakbang para mapalakas ang independence ng hudikatura, mapabilis ang pagresolba ng kaso, at maisulong ang modernization ng court facilities.

Gayundin sa 10:00 a.m., pangungunahan ni Sen. Risa Hontiveros ang organizational meeting ng Committee on Health and Demography. Iaanunsyo rito ang bagong komposisyon ng komite at tatalakayin ang review ng Universal Health Care (UHC) Act implementation. Kasama sa agenda ang:

• P.S. Res. No. 37 – Implementation ng UHC Act

• P.S. Res. No. 66 – Imbestigasyon sa umano’y medical negligence at systemic failures sa East Avenue Medical Center

• Mga panukalang batas (S. Nos. 689, 780, 962) para sa rationalization ng hospital bed capacity at zero balance billing

• Mga panukalang batas (S. Nos. 404, 409) para sa Medical Assistance to Indigent and Financially Incapacitated Patients (MAIFIP) Program.

Muling tatalakayin din ang privilege speech ni Sen. JV Ejercito noong August 11, “Your Health is an Investment, Not an Expense,” kasama ang mga naging interpellations.

Sa 12:00 noon, magpapatuloy naman ang deliberasyon sa Senate Finance Subcommittee E na pinamumunuan ni Sen. Ronald “Bato” Dela Rosa. Tatalakayin dito ang proposed 2026 budget ng Marawi Compensation Board, National Amnesty Commission, at Office of the Presidential Adviser on Peace, Reconciliation, and Unity. Sentro ng diskusyon ang reparations para sa mga biktima ng Marawi siege, amnestiya, at iba pang peacebuilding initiatives.

Sa dami at bigat ng mga agenda, ipinapakita ng Senado ang mahalagang papel nito sa pagsugpo ng korapsyon, pagpapalakas ng justice system, pagtutok sa kalusugan, at pagtataguyod ng kapayapaan.