SETYEMBRE 22, 2025 — Magsasara na ang kabanata ng Volkswagen sa ilalim ng Ayala Group sa Pilipinas matapos ang higit isang dekadang operasyon. Kinumpirma ng Automobile Central Enterprise Inc. (ACEI), ang eksklusibong distributor ng VW sa bansa, na tatapusin na nito ang ugnayan sa Volkswagen AG simula Oktubre 1, 2025.

Sa opisyal na pahayag ng VW Philippines, sinabi nito: “We’d like to inform you that Automobile Central Enterprise, Inc. (ACEI) and Volkswagen AG have agreed to conclude the distribution of Volkswagen vehicles in the Philippines.” 

(Nais naming ipabatid na nagkasundo ang ACEI at Volkswagen AG na tapusin ang distribusyon ng Volkswagen vehicles sa Pilipinas.)

Ang flagship showroom ng VW sa Bonifacio Global City ay magsasara na sa katapusan ng Setyembre. Lahat ng dealership operations sa bansa ay ititigil “until further notice from Volkswagen AG,” ayon sa ACEI.

Bagama’t tuluyan nang mawawala ang presensya ng VW sa retail market, tiniyak ng kumpanya na mananatiling bukas ang kanilang service centers sa Alabang, Pampanga, at Cebu. Patuloy rin umano ang warranty coverage at supply ng original VW parts para sa mga kasalukuyang may-ari ng sasakyan.

Ang mga modelong VW na ibinebenta sa bansa gaya ng Tharu, T-Cross, at Lamando ay pawang gumagamit ng gasolina. Sa kabila nito, hindi naging sapat ang kanilang performance upang makipagsabayan sa mga dominanteng Japanese brands gaya ng Toyota.

Sa pandaigdigang merkado, patuloy ang pagbagsak ng VW. Ayon sa Deutsche Welle, “Volkswagen is reeling from a massive sales and cost crisis and falling profits.” 

(Ang Volkswagen ay dumaranas ng matinding krisis sa benta at gastos, pati na rin ng bumababang kita.)

Dagdag pa ng DW, “It plans to scrap three plants and thousands of jobs in Germany.” 

(Plano nitong isara ang tatlong planta at tanggalin ang libu-libong trabaho sa Germany.)

Isa sa mga dahilan ng paghina ng VW ay ang mabagal nitong paglipat sa electric vehicle (EV) segment, kung saan mas mabilis ang pag-usad ng Tesla at mga Chinese manufacturers.

Sa lokal na konteksto, nananatiling internal combustion engine (ICE) ang pangunahing teknolohiya ng mga sasakyan sa Pilipinas, bagama’t unti-unti nang tumataas ang benta ng EVs. Ang Ayala Group ay aktibo pa rin sa industriya ng sasakyan sa pamamagitan ng AC Motors, na siyang distributor ng BYD, Kia, Maxus, Honda, at Isuzu.

Sa pag-alis ng VW Philippines, ang mga nais pa ring bumili ng VW ay kinakailangang dumaan sa direktang importasyon o maghintay ng bagong distributor na papalit sa puwesto ng ACEI.

(Larawan: Volkswagen Philippines)