OKTUBRE 27, 2025 — Isang bagong kampus ng Ateneo de Manila University ang nakatakdang itayo sa General Trias, Cavite, bilang bahagi ng lumalawak na Riverpark township na pag-aari ng GT Capital Holdings Inc. at ng mga ka-partner nitong developer.

Ayon sa GT Capital, ang 15-ektaryang lote sa Riverpark ang magiging tahanan ng Ateneo campus na inaasahang bubuksan sa taong 2030. Ang Riverpark ay proyekto ng Federal Land Inc. at Federal Land NRE Global Inc. (FNG), at kasalukuyang may UNIQLO Logistics Facility. Malapit na ring itayo ang SM City General Trias sa lugar.

Sa 2026, magkakaroon ng direktang koneksyon ang Riverpark sa Cavite-Laguna Expressway sa pamamagitan ng Open Canal Interchange, na inaasahang magpapabilis sa biyahe papunta at palabas ng township.

Noong Mayo, iniulat ng FNG na ubos na ang unang batch ng commercial lots sa Riverpark. Ang mga bumili ay magtatayo ng mga opisina, retail spaces, at iba pang mixed-use na pasilidad.

Sinabi ni Alfred Ty, vice chairman ng GT Capital, na ang proyekto ay may layuning palakasin ang edukasyon sa Cavite. 

“Ateneo’s presence in Riverpark not only strengthens the educational landscape of Cavite but also uplifts the lives of the communities we serve,” aniya. 

(Ang presensya ng Ateneo sa Riverpark ay hindi lang nagpapalakas sa edukasyong pangrehiyon kundi nakakatulong din sa mga komunidad na aming pinaglilingkuran.)

Dagdag pa ni Ty, “Our investment in this campus reflects our long-term commitment to creating sustainable value for generations of Filipinos, anchored on the values of excellence and service.” 

(Ang aming pamumuhunan sa kampus na ito ay patunay ng pangmatagalang hangarin naming maghatid ng makabuluhang halaga sa mga susunod na henerasyon ng mga Pilipino, batay sa prinsipyo ng kahusayan at serbisyo.)

Para naman kay Fr. Roberto Yap, pangulo ng Ateneo, “The new Ateneo campus in Riverpark allows us to extend our mission and provide more families in Cavite and nearby provinces with access to quality education rooted in our Jesuit tradition.” 

(Ang bagong kampus ng Ateneo sa Riverpark ay nagbibigay daan upang mapalawak namin ang aming misyon at maihatid sa mas maraming pamilya sa Cavite at karatig-lalawigan ang dekalidad na edukasyong nakaugat sa tradisyong Jesuit.)

(Larawan: Ateneo de Manila University | Facebook)