MANILA — Umantig sa marami ang naging tapat na pahayag ni Nadine Lustre hinggil sa isyu ng pagiging ina, matapos niyang aminin na sa kasalukuyan ay hindi pa siya handa at may pangamba pa sa responsibilidad na kaakibat nito.

Sa panayam ni MJ Felipe ng TV Patrol kaugnay ng nalalapit niyang pelikula para sa Metro Manila Film Festival (MMFF) kasama si Vice Ganda na may pamagat na Call Me Mother, natanong ang aktres kung paano niya tinitingnan ang tema ng motherhood—na sentro ng kanilang proyekto.

Ngunit diretsahang tugon ni Nadine: “Nakakatakot maging nanay, honestly. Takot na takot ako.” Ayon pa sa kanya, tuwing napag-uusapan ang pagkakaroon ng anak, hindi pa niya nakikita ang sarili na haharap sa ganoong papel.

Paliwanag ng aktres, matindi ang kanyang focus sa kanyang karera at negosyo, dahilan kung bakit hindi pa siya handa sa panibagong yugto ng pagiging magulang. “I’ve been working for as long as I can remember, and I can’t imagine having another responsibility other than my career,” aniya. Dagdag pa niya, “I’m so focused with my career, of course this guy [ang kanyang partner], and our businesses as well, so parang hindi ako ready.”

Gayunman, kahit may takot at pangamba, ipinakita ni Nadine ang kanyang malalim na paghanga sa lahat ng mga ina. “Saludo talaga ako sa mga mommies,” pagtatapos niya, na umani ng papuri mula sa mga netizens dahil sa pagiging totoo at tapat ng kanyang pahayag.

Sa kabila ng pressure ng showbiz at mga intriga, pinatunayan muli ni Nadine na nananatili siyang prangka at grounded—isang katangian na lalo pang nagpapatibay ng kanyang koneksyon sa kanyang mga tagahanga. (Larawan: Nadine Lustre / Facebook)