ISABEL, Marso 11, 2025 — Apat na pizzeria mula sa Pilipinas ang napabilang sa 50 best pizzerias sa Asia Pacific (APAC) ngayong 2025. Ginawa ang 50 Top Pizza Awards sa Istituto di Cultura Tokyo sa Japan noong Lunes, kung saan pinarangalan ang mga nabanggit na Philippine establishments.

Ang Crosta Pizzeria sa Makati ay pumangalawa noong 2024, ngunit bumaba sa ika-5 pwesto ngayong taon. Pag-aari ito nina Ingga Cabangon-Chua at Thomas Wudwyk at pinamumunuan ni Chef Yuichi Ito. Sikat ang Crosta dahil sa kanilang sourdough crust at mga opsyon para sa vegetarian at vegan.

Ang A Mano ay umangat sa ika-7 pwesto mula sa ika-12 noong nakaraang taon. Pag-aari ito ni Amado Fores, anak ng yumaong Chef Margarita Fores, at kilala ito sa kanilang tradisyonal na pizza na niluluto sa iconic na pulang Valoriani oven.

Ang Wildflour Italian naman ay nasa ika-42 pwesto, bahagyang bumaba mula sa ika-38 noong 2024. Bahagi ito ng Wildflour group na pinangungunahan ni Ana Lorenzana de Ocampo at founding partners Walter at Margarita Manzke. Kilala sila sa kanilang wood-fired brick oven pizzas.

Bagong pasok sa listahan ang Minante Pizzeria sa Cebu, na nasa ika-48 pwesto. Pag-aari nina Matteo Minante at Jan Rodriguez, ang Minante ang kauna-unahang pizzeria sa Pilipinas na kinilala ng True Neapolitan Pizza Association. Bukod sa kanilang authentic Neapolitan pizza, nag-aalok din sila ng pasta, charcuterie, at iba pang putahe.

Ang top 5 pizzerias sa APAC ay ang The Pizza Bar on 38th at RistoPizza by Napoli Sta Ca (Tokyo, Japan), Fiata By Salvatore Fiata (Hong Kong), Massilia (Bangkok, Thailand), at Shop 225 (Melbourne, Australia).

Bahagi rin ng event ang tribute para sa yumaong Chef Margarita Fores.

Ang 50 Top Pizza Awards, na itinatag ng 50 Italy Group noong 2017, ay nagsimula sa Italy bago lumawak globally para isama ang APAC region.

Larawan: Ivan Torres/Unsplash