Oktubre 29, 2025 – Nagbigay ng pahayag ang Municipal Mayor ng Bulusan, Sorsogon na si Wennie Rafallo-Romano kaugnay sa kontrobersyal na pahayag ni Vice Ganda tungkol sa umano’y “bulok na paaralan” sa probinsya ni Heart Evangelista.

Sa opisyal na statement na inilabas ng alkalde nitong October 28, kinilala niya ang kabutihang ginawa ni Vice matapos magbigay ng donasyon sa Bagacay Elementary School noong 2023. Ngunit ayon sa kanya, may mga salitang nasabi ang “Unkabogable Star” na hindi umano nakatulong sa imahe ng paaralan at ng Department of Education (DepEd).

“Bagamat nagpapasalamat kami sa kanyang tulong, nagdulot naman ng kahihiyan ang paraan ng pagkukuwento ni Vice Ganda tungkol sa eskwelahan,” ani Mayor Romano.

Ipinaliwanag ng alkalde na bago pa man dumalaw si Vice sa Bulusan ay mayroon nang permanenteng classroom na ipinagawa ng DepEd, pati na rin kumpletong aklat at reading materials para sa mga estudyante.

Dagdag pa ni Mayor Romano, “Nabalewala tuloy ang pagsusumikap ng mga guro, magulang, at lokal na pamahalaan na mapaganda ang pasilidad ng paaralan. Hindi naman totoo na bulok ito o walang babasahin ang mga bata.”

Ayon sa report, nagbigay si Vice ng P67,360 na donasyon na ginamit sa pagkukumpuni ng bintana, pinto, at dingding ng makeshift classroom, pati na rin sa pagpapagawa ng comfort room at pagpapakabit ng internet sa loob ng tatlong buwan.

Matatandaan na sa isang episode ng It’s Showtime noong October 24, ibinahagi ni Vice Ganda ang karanasan niya sa pagbisita sa probinsya ni Heart Evangelista.

Ani Vice sa show, “May pinuntahan akong eskwelahan sa lugar nina Heart Evangelista na walang reading materials. Pinagawa ko ‘yong paaralan kasi sobrang nalungkot ako. Bulok ‘yong school, naiyak talaga ako.”

Dahil dito, agad nag-viral ang pahayag at umani ng sari-saring reaksiyon online—lalo na mula sa mga taga-Bulusan na nagsabing hindi patas ang naging paglalarawan ni Vice sa kanilang bayan.

Sa ngayon, nananatiling tahimik si Heart Evangelista sa isyu, habang patuloy namang pinupuri ng ilan si Vice Ganda sa kabutihan ng kanyang intensyon kahit pa nagkaroon ng kalituhan sa mga pahayag.

Ano sa tingin n’yo, mga ka-Marites? Good intentions gone wrong ba ito o simpleng misunderstanding lang sa pagitan nina Vice at ng LGU Bulusan?