Disyembre 5, 2025 – Pumanaw na noong Huwebes, Disyembre 4, 2025, si Errol “Budoy” Marabiles, dating housemate ng Pinoy Big Brother: Celebrity Edition 1 at lead vocalist ng kilalang Bisaya reggae band na Junior Kilat. Siya ay 54 taong gulang.

Kinumpirma ang malungkot na balita ng kanyang business partner sa Sigbin Haus, isang musicians’ bar sa Santander, Cebu, sa pamamagitan ng isang post sa Facebook. Ayon sa kanyang post:

"It is with a heavy heart I write this. Today at 3pm my partner at Sigbinhaus and best friend for almost 20 years, Errol 'Budoy' Marabiles, suddenly left us. I could write a ton about our good memories, but right now, I feel just so empty and lonely."

Wala pang pahayag mula sa pamilya ni Budoy tungkol sa sanhi ng kanyang pagpanaw habang isinusulat ang ulat na ito.

Kilalanin si Budoy Marabiles

Bago sumikat sa Pinoy Big Brother noong 2006, kilala na si Budoy bilang frontman ng Junior Kilat, na nagpatugtog ng mga kantang tulad ng “Kawatan,” “Ako Si M16,” “Buwad Suka Sili,” “Budoy,” at “Sigbin Dub.”

Sa PBB, nakasama niya sina Zanjoe Marudo, Bianca Gonzalez, John Prats, BB Gandanghari, Roxanne Barcelo, Christian Vasquez, Aleck Bovick, at ang Big Winner na si Keanna Reeves.

Bukod sa musika, aktibo rin si Budoy sa mga kilos-protesta laban sa katiwalian sa Cebu, kabilang ang mga protesta laban sa umano’y ghost flood control projects. Madalas niyang gamitin ang kanyang talento sa musika upang palakasin ang mensahe ng kanyang adbokasiya.

Ang pagkawala ni Budoy Marabiles ay nagdulot ng labis na kalungkutan sa kanyang pamilya, kaibigan, at mga tagahanga, lalo na sa mga sumubaybay sa kanyang musika at advocacy.