MANILA, Philippines, Marso 13, 2025 — Isinampa ang isang pormal na reklamo laban kay Menchie Beronilla Bernos, unang nominado ng Solidarity of Northern Luzon People (Solid North) party-list, dahil sa umano’y vote-buying sa isang event ng Department of Education (DepEd) sa Abra.

Inihain ng residente na si Herminio Zapata ang reklamo sa Commission on Elections (Comelec) noong Marso 7, 2025.

Ayon sa reklamo, nangyari ang umano'y pamimili ng boto sa DepEd Abra Education Summit na ginanap noong Pebrero 15, 2025, sa Governor Andres Bernos Memorial Gymnasium.

Isinumbong ni Zapata na bagama’t walang opisyal na posisyon si Bernos sa DepEd, nakita umano itong nasa entablado kasama ang kanyang asawa, si Schools Division Superintendent Amador Garcia, at iba pang mga kawani ng DepEd.

Batay sa reklamo, matapos ang talumpati ni Bernos, tumanggap daw ng P3,000 at mga tumbler ang mga dumalo sa aktibidad. Nakalagay umano sa mga tumbler ang pangalan na "Cong Ching Bernos," ang Solid North circular logo, at ang kanilang opisyal na ballot number.

Giit ni Zapata, nilabag ng mga kilos na ito ang Sections 261 (a) (1) at (b) ng Omnibus Election Code of the Philippines na nagbabawal sa vote-buying at vote-selling, at nagpaparusa sa mga sabwatan para suhulan ang mga botante.

Kinumpirma ni Comelec Chairman George Erwin Garcia ang pagkatanggap ng reklamo at nangakong paiimbestigahan ito. “We have received the complaint and will conduct a thorough investigation to determine the veracity of the allegations,” pahayag ni Garcia.

Nagpahayag din si Zapata ng pag-aalala na baka nauwi sa pamumulitika ang mga aktibidad ng gobyerno. “The presence of tarpaulins bearing the Solid North party-list logo at the venue and the distribution of cash and tumblers with political labels are alarming and warrant a thorough investigation,” ayon sa kanyang reklamo.

Sa panig naman ni Bernos, mariin niyang itinanggi ang akusasyon at iginiit na pang-edukasyon lamang ang nasabing event. “The event was organized to discuss educational initiatives and programs for the benefit of the students and teachers in Abra. Any allegations of vote-buying are baseless and politically motivated,” paliwanag niya.

Naglabas din ng pahayag ang DepEd na naglalayo mula sa isyu. “The Department of Education is committed to maintaining the integrity of its programs and activities. We do not condone any form of political activity during our events,” ayon kay DepEd spokesperson Michael Poa.

Tiniyak ni Chairman Garcia na ipatutupad ng Comelec ang mahigpit na hakbang laban sa vote-buying at vote-selling, lalo na sa nalalapit na pambansang halalan. “We are committed to ensuring a fair and honest election process. Any form of vote-buying and selling will be dealt with accordingly,” dagdag pa niya.

Larawan mula sa Boss Toyo Facebook Page