Amerika, nag-alok ng $120M na training helicopters sa Pilipinas
Abril 16, 2025 — Inalok ng Estados Unidos ang Pilipinas ng fleet ng TH-73A training helicopters na nagkakahalaga ng humigit-kumulang $120 milyon, ayon kay Philippine Ambassador to the US Jose Manuel Romualdez.
Kinumpirma ni Romualdez ang alok sa isang panayam nitong Miyerkules, at binigyang-diin na ang desisyon sa pagbili ay nasa kamay ng Department of National Defense (DND) na pinamumunuan ni Secretary Gilberto Teodoro.
“These are all offers being made to us. Ultimately, it's our decision and if we can afford it,” ani Romualdez.
Inaprubahan na ng US State Department ang posibleng pagbebenta, na may kasamang support package tulad ng aircraft simulators, spare engines, fuel tanks, aircraft hoists and lifts, commercial avionics, at flight management systems. Ipinadala ng Defense Security Cooperation Agency (DSCA) ang certification sa US Congress noong Abril 15.
Layunin ng alok na palakasin ang kakayahan ng Pilipinas sa training ng piloto upang matugunan ang kasalukuyan at hinaharap na banta. Ang TH-73A ay nakikitang magiging pangunahing platform para sa pagsasanay ng mga military helicopter pilot sa bansa.
Ayon sa DSCA, “The proposed sale will support the foreign policy and national security of the United States by helping to improve the security of a strategic partner that continues to be an important force for political stability, peace, and economic progress in Southeast Asia.”
Idinagdag ni Romualdez na, “The assets will significantly boost the training capabilities of the Philippine military, ensuring that our pilots are well-prepared for various operational scenarios.”
Nilinaw rin niya na kakailanganin ng karagdagang US government at contractor personnel na magtungo sa Pilipinas sa loob ng tatlong taon upang tumulong sa orientation, deployment, at training kaugnay ng mga helicopter.
Kasabay ng alok na ito ang nagpapatuloy na military exercises sa pagitan ng Pilipinas at Estados Unidos tulad ng Cope Thunder 25-1 air drills na layuning palakasin ang air defense capabilities ng dalawang bansa.
Habang pinag-aaralan ng Pilipinas ang naturang alok, tinitingnan ito bilang isang malaking hakbang sa pagpapalakas ng depensa ng bansa at sa paghahanda ng mga sundalong piloto para sa iba't ibang operational scenarios.