Hunyo 17, 2025 — Inaresto sa Quezon City nitong Lunes ng hapon si Francis Steve Fontillas, dating pulis na naging vlogger, dahil sa kasong sedition na may kaugnayan sa kanyang kontrobersyal na mga social media post laban sa pamahalaan.

Ayon sa National Capital Region Police Office (NCRPO), nadakip si Fontillas batay sa warrant of arrest mula sa Quezon City Regional Trial Court Branch 224. Kinasuhan siya ng inciting to sedition sa ilalim ng Republic Act 10175 o Cybercrime Prevention Act, at itinakda ang piyansa sa ₱36,000.

Nanggaling ang reklamo sa mga Facebook post ni Fontillas noong Marso, kung saan diumano’y nanawagan siya sa pagbagsak ng administrasyong Marcos kasunod ng pagkaka-aresto ni dating Pangulong Rodrigo Duterte.

Sa isa sa kanyang post, binantaan pa raw ni Fontillas ang International Criminal Court (ICC) at Interpol, na huwag makialam kay Duterte. Isinuot pa niya ang uniporme ng pulis habang sinasabi ito, dahilan upang mabilis itong mag-viral at magdulot ng pangamba sa posibleng kaguluhan.

Nauna nang sinibak si Fontillas mula sa Philippine National Police (PNP) noong Mayo 8, 2025, dahil sa grave misconduct, conduct unbecoming of a police officer, at disloyalty to the government. Inihain ng Quezon City Police District (QCPD) ang sedition complaint noong Marso 18, gamit ang kanyang mga pahayag online bilang ebidensya ng paglabag sa Revised Penal Code.

Nilinaw ni PNP Chief Gen. Nicolas Torre III na hindi kinakatawan ni Fontillas ang buong hanay ng PNP, at wala itong tagasunod sa loob ng organisasyon. “I don’t think that he has any following in the PNP,” ani Torre. Binigyang-diin din niyang zero tolerance ang PNP sa political bias.

Ipinagtanggol naman ni Fontillas ang kanyang sarili at iginiit ang kanyang karapatang magsalita. “Inciting to sedition daw ‘yung ginawa ko? Hahaha. Okay lang ba kayo? I only expressed my stand and my principles. Where’s our right to freedom of expression now? Kawawa naman ang Pilipinas. Hahaha,” aniya sa isang naunang Facebook post.

Wala pang inilalabas na karagdagang detalye ang mga awtoridad hinggil sa legal na proseso ni Fontillas. Samantala, mahigpit na binabantayan ng kanyang mga tagasuporta at kritiko ang magiging takbo ng kaso.