Ayon kay Frederick Go, Special Assistant to the President for Investment and Economic Affairs, walang katotohanan ang naturang balita at malinaw na maling impormasyon ito na nagmula sa social media. Ipinahayag ni Go na nakipag-ugnayan siya kay dating Securities and Exchange Commission (SEC) Chairman Francis Lim, na umano’y pinagmulan ng naturang pahayag.

Paliwanag ni Go, nilinaw ni Lim na siya mismo ay nabiktima rin ng maling balita matapos mapalabas online na siya ang nagsabing may P1.7 trilyong pagkalugi. Giit ng opisyal, walang inilabas na opisyal na ulat ang SEC hinggil sa nasabing halaga at walang sapat na batayan para sabihing bumagsak nang ganoon kalaki ang merkado.

Dagdag pa ni Go, hindi totoo ang sinasabing 12 porsiyentong pagbagsak ng Philippine Stock Exchange Index (PSEi) sa pagitan ng Agosto 11 at 29. Sa aktuwal na datos, nasa 1.5 porsiyento lamang ang ibinaba ng index sa nasabing panahon — patunay na malayo ito sa ipinapakalat na numero.

Binigyang-diin din ng opisyal na nananatiling matatag ang kumpiyansa ng mga mamumuhunan sa bansa at walang ebidensya ng malawakang pag-atras ng mga investors dahil sa mga isyu sa korapsyon o pulitika. Ayon kay Go, patuloy ang pagpasok ng mga dayuhang puhunan at proyekto na magpapalakas pa sa ekonomiya ng Pilipinas.

Nanawagan naman ang Malacañang sa publiko na maging maingat sa pagbabahagi at paniniwala sa mga impormasyon sa social media, lalo na kung hindi ito mula sa mga lehitimong source. Babala pa ng Palasyo, ang pagkalat ng mga pekeng balita tungkol sa ekonomiya ay maaaring magdulot ng takot, maling interpretasyon, at negatibong epekto sa merkado.

Tiniyak ng administrasyon na patuloy itong maglalabas ng tamang impormasyon hinggil sa kalagayan ng ekonomiya upang mapanatili ang tiwala ng mga mamamayan at mamumuhunan sa bansa.