AGOSTO 4, 2025 — Pupunta si Pangulong Ferdinand Marcos Jr. sa India para pagtibayin ang ugnayan ng dalawang bansa, partikular sa larangan ng teknolohiya, murang gamot, at seguridad sa pagkain. Layunin ng state visit na ito, na ginaganap sa ika-75 anibersaryo ng relasyong diplomatiko ng Pilipinas at India, na makakuha ng mga konkretong benepisyo para sa mga Pilipino.

“I want this visit to bring concrete benefits to the people, such as more affordable medicine and greater connectivity and food security,” pahayag ni Marcos bago lumipad mula sa Villamor Air Base ngayong Lunes nang umaga.

(Nais ko na magdulot ang pagbisitang ito ng tunay na benepisyo sa taumbayan, gaya ng mas murang gamot, mas maayos na koneksiyon, at mas matatag na seguridad sa pagkain.)

Kasama niya ang mga kalihim ng gabinete para makipag-negosasyon sa mga kompanyang Indiano.

Pangunahing pag-uusapan sa New Delhi at Bangalore ang posibleng pamumuhunan ng India sa sektor ng IT, telekomunikasyon, at pangangalagang pangkalusugan. Marami nang kompanyang Indiano ang nag-ooperate sa Pilipinas, at nais pa itong palawakin ni Marcos.

Binigyang-diin ni Pangulong Marcos na maaaring makinabang ang Pilipinas sa India, na kasalukuyang ikaapat sa pinakamalaking ekonomiya ng mundo, partikular sa murang gamot at advanced na teknolohiya.

Bukod sa negosyo, binigyang-diin din ni Marcos ang pagkakasundo ng dalawang bansa sa demokrasya at seguridad sa dagat. Parehong sumusuporta ang Pilipinas at India sa United Nations Convention on the Law of the Sea (UNCLOS) at sa malayang paglalayag sa Indo-Pacific.

“With the Philippines being the oldest constitutional democracy in Asia, and India being our continent’s largest democracy, our two countries share several core interests,” dagdag niya.

(Bilang pinakamatandang konstitusyunal na demokrasya sa Asya ang Pilipinas, at pinakamalaki namang demokrasya sa kontinente ang India, marami tayong magkatulad na pangunahing interes.) 

Kamakailan, inalis na ng Pilipinas ang visa requirement para sa mga Indiano para mas mapadali ang turismo at people-to-people exchanges.

Babalik si Marcos sa Pilipinas sa Agosto 8, at inaasahang may mga kasunduan nang magdudulot ng tunay na pag-unlad para sa bansa.

(Larawan: RTVM)