MANILA — Binigyan ng ultimatum si Ako Bicol Rep. Zaldy Co na bumalik sa bansa bago mag-Lunes, Setyembre 29, 2025, upang harapin ang mga kasong isinampa laban sa kanya kaugnay ng alegasyong katiwalian sa flood control projects. Ito ay ayon kay House Speaker Faustino Dy III.

Ayon kay Dy, ang pagbawi ng travel clearance ni Co ay hindi nangangahulugang paghusga sa kongresista, kundi isang hakbang upang tiyakin na sasagutin nito ang mga alegasyon sa tamang forum. Binigyan din si Co ng malinaw na babala: kung hindi siya makakabalik sa itinakdang petsa, maaaring sumailalim ito sa mga legal at disciplinary na aksyon.

“Hindi po ito hatol, kundi pagkakataon para si Rep. Co ay makapagpaliwanag at makaharap ang mga kinauukulan. Nais nating masiguro ang kaligtasan niya at ng kanyang pamilya habang isinasagawa ang proseso,” ani Dy.

Si Rep. Co ay nahaharap sa mga kasong indirect bribery at malversation na isinasampa ng National Bureau of Investigation (NBI). Ito ay kaugnay ng umano’y anomalya sa flood control projects na pinaniniwalaang nagkaroon ng kickback scheme. Kabilang sa mga naitalang posibleng sangkot ang ilang senador, gaya nina Sen. Joel Villanueva at Sen. Jinggoy Estrada.

Ayon sa mga ulat, walang itinakdang timeline ang imbestigasyon, ngunit tiniyak ng NBI na patuloy ang kanilang pagsisiyasat sa lahat ng posibleng sangkot sa proyekto.

Ang mga hakbang na ito ay bahagi ng mas malawak na kampanya ng Kamara at ng mga ahensya ng gobyerno laban sa katiwalian sa proyekto ng flood control, na matagal nang kinokondena ng publiko.