MANILA — Sa botong 15 pabor, 3 tutol, at 2 abstain, inaprubahan ng Senado ngayong Miyerkules ang isang resolusyon na humihiling sa International Criminal Court (ICC) na ilagay si dating Pangulong Rodrigo Duterte sa house arrest dahil sa tinukoy na mga “humanitarian reasons.”

Pinangunahan ang naturang resolusyon ng siyam na senador na nagsilbing mga pangunahing sponsor: Senate Majority Leader Juan Miguel Zubiri, Rodante Marcoleta, Imee Marcos, Alan Peter Cayetano, Robin Padilla, Ronald “Bato” dela Rosa, Joel Villanueva, Jinggoy Estrada, at Christopher “Bong” Go. Sa nominal voting, kabilang din sa mga bumoto ng “Yes” sina Sherwin Gatchalian, JV Ejercito, Loren Legarda, Panfilo Lacson, Erwin Tulfo, at Mark Villar.

Samantala, tatlong senador ang mariing tumutol sa hakbang: Risa Hontiveros, Bam Aquino, at Kiko Pangilinan. Iginiit ng mga ito na hindi dapat panghimasukan ng Senado ang mga proseso ng ICC, lalo na’t hiwalay at independiyente ang hurisdiksiyon ng korte. Dalawang senador naman ang nag-abstain—Senate President Tito Sotto at Raffy Tulfo—habang apat ang lumiban sa sesyon: Lito Lapid, Pia Cayetano, Cynthia Villar, at Chiz Escudero.

Sa panig ng mga nagsusulong ng resolusyon, binigyang-diin nila na bagama’t patuloy ang imbestigasyon ng ICC laban sa dating pangulo kaugnay ng mga umano’y libo-libong kaso ng pagpatay sa war on drugs, nararapat pa ring isaalang-alang ang kanyang kalagayan bilang nakatatanda at dating pinuno ng bansa. Ayon sa kanila, ang panukala ay hindi pagharang sa proseso ng hustisya, kundi isang pakiusap upang mapagaan ang kalagayan ng dating pangulo habang dinidinig ang kaso.

Bagama’t walang direktang kapangyarihan ang Senado na ipatupad ang nasabing house arrest, nakikita ang resolusyon bilang isang pormal na posisyon ng institusyon na maaaring isaalang-alang ng pamahalaan at ng ICC. Nanatili namang hati ang opinyon ng publiko at ng mga eksperto kung makabubuti ba ang naturang hakbang, sa gitna ng tumitinding tensiyon hinggil sa imbestigasyon sa madugong kampanya kontra droga ng administrasyong Duterte.

Larawan mula sa Inquirer.net