TALISAY CITY, Negros Occidental — Arestado ang isang 39-anyos na motorcycle mechanic, na itinuturing na No. 1 most wanted person sa Negros Island Region (NIR), matapos umano nitong gahasain ang sariling inaanak sa lungsod na ito.

Kinilala ng mga awtoridad ang suspek bilang pangunahing akusado sa anim na bilang ng statutory rape at tatlong bilang ng acts of lascivious conduct sa ilalim ng Section 5 ng Republic Act 7610 o Special Protection of Children Against Abuse, Exploitation, and Discrimination Act.

Ayon sa Police Regional Office–Negros Island Region (PRO-NIR), walang piyansa ang anim na kaso ng rape, samantalang itinakda naman sa ₱180,000 bawat isa ang piyansa para sa tatlong bilang ng lascivious conduct.

Batay sa imbestigasyon, nagsimula umano ang pang-aabuso noong Disyembre 10, 2023, at nagpatuloy hanggang Abril 12, 2025, ayon sa salaysay ng biktima at ng kanyang ina sa mga pulis. Magkapitbahay umano ang suspek at biktima, bagay na nagbigay sa akusado ng madalas na access sa bata.

Ayon kay Police Lt. Col. Joem Malong, tagapagsalita ng PRO-NIR, ang kaso ay isinampa sa City Prosecutor’s Office noong Hunyo 21, 2025, matapos makakalap ng sapat na ebidensiya at testimonya laban sa suspek.

Nadakip ang akusado habang nasa kustodiya na ng pulisya kaugnay ng isang hiwalay na kaso ng sexual abuse, nang ipatupad ng mga awtoridad ang mga warrant of arrest laban sa kanya.

Pinuri ni Police Brig. Gen. Arnold Thomas Ibay, direktor ng PRO-NIR, ang matagumpay na operasyon, na aniya’y patunay ng patuloy na kampanya ng pulisya laban sa mga kriminal na nagtatago sa batas.

“Walang takas sa hustisya. Gaano man katagal silang magtago, haharap din sila sa kanilang mga kasalanan,” pahayag ni Ibay.

Sa kasalukuyan, nananatili sa custodial facility ng Talisay City Police Station ang suspek habang inaasahan ang paglilitis ng kaso.

larawan/google