MANILA — Binatikos ni Senator Raffy Tulfo ang Philippine Ports Authority (PPA) sa umano’y “immoral at iskandalosong overpricing” ng 191 body-worn cameras na binili sa halagang P168 milyon, o P879,000 kada unit, ayon sa kanyang pahayag sa Senate budget hearing para sa Department of Transportation (DOTr) nitong Oktubre 9.

“Sir, ang pinag-uusapan dito sobrang overpricing. Immoral na ito, eskandaloso na masyado ‘to,” ani Tulfo, habang kinukuwestiyon ang kontrata sa Boston Home Inc., isang kumpanyang may paid-up capital na P10 milyon at opisina sa isang apartment sa Sta. Mesa Heights, Quezon City.

Ayon sa PPA General Manager Jay Santiago, ang presyo ay hindi lamang para sa mismong camera kundi para sa buong surveillance system, kabilang ang servers, software, training, at system integration. “Hindi lamang po ‘yun camera. Meron po kasi itong sistema, meron po ‘tong servers na kasama,” paliwanag ni Santiago.

Ngunit hindi kumbinsido si Tulfo, na iginiit na ang PNP body-worn cameras ay nagkakahalaga lamang ng P135,000 kada isa, at may mga mas murang alternatibo online na nagkakahalaga ng P6,000. “Go to Shopee — it’s ₱6,000, all in. But this one costs ₱1 million?” aniya.

Dagdag pa ni Tulfo, ang Boston Home ay na-flag na ng Commission on Audit (COA) sa nakaraan dahil sa pag-supply ng depektibong kagamitan sa Environmental Management Bureau (EMB). “If only you had done a background check, you would have found out that they had sold defective equipment to the EMB,” giit niya.

Hinimok ni Tulfo si DOTr Secretary Giovanni Lopez na imbestigahan ang kontrata at panagutin ang mga opisyal ng Bids and Awards Committee (BAC) ng PPA. “Heads must roll,” ani Tulfo, sabay diin na dapat mahigpit na background check ang isinasagawa sa mga bidder ng gobyerno.