Oktubre 12, 2025 – Pansamantalang sinuspinde ng Department of Education (DepEd) ang face-to-face classes sa lahat ng pampublikong paaralan sa Metro Manila sa Lunes at Martes, Oktubre 13 at 14, bilang pag-iingat laban sa pagkalat ng mga sakit na may sintomas ng trangkaso at upang magsagawa ng pagsusuri sa kaligtasan ng mga gusali matapos ang mga nagdaang lindol.

Ayon sa DepEd, layunin ng dalawang araw na suspensyon na bigyang-daan ang masusing disinfection at sanitation sa mga paaralan, kasunod ng pagtaas ng bilang ng mga estudyanteng nakararanas ng lagnat, ubo, at sipon sa ilang lungsod sa rehiyon.

Kasabay nito, magsasagawa rin ng structural integrity checks sa mga gusali at pasilidad ng paaralan upang matiyak na ligtas ang mga ito matapos maramdaman ang ilang pagyanig nitong mga nakaraang araw.

Sa panahon ng suspensyon, inatasan ng ahensya ang mga guro na ipagpatuloy ang pag-aaral sa pamamagitan ng Alternative Delivery Modes, gaya ng online o modular learning.

Pinag-uutos din ng DepEd na gamitin ng mga paaralan ang dalawang araw upang:

Linisin at i-disinfect ang mga silid-aralan at karaniwang lugar;

Suriin ang kalagayan ng mga gusali at pasilidad;

Magsanay sa mga earthquake at emergency drills; at

Paigtingin ang mga alituntunin sa kalusugan at kaligtasan ng mga mag-aaral at kawani.

Hinihikayat din ng kagawaran ang mga pribadong paaralan na sumunod sa mga nabanggit na hakbang para sa kaligtasan ng kanilang komunidad.

Nauna rito, nagdeklara ang Lungsod ng Marikina ng dalawang araw na health break sa mga paaralan matapos tumaas ang bilang ng mga mag-aaral na may flu-like symptoms.

Patuloy na nakikipag-ugnayan ang DepEd sa mga lokal na pamahalaan sa NCR upang masubaybayan ang sitwasyon at masiguro ang kaligtasan ng mga mag-aaral bago ipagpatuloy ang klase.