SAN ANDRES, QUEZON — Patuloy ang isinasagawang road clearing at pagpapalawak ng kalsada ng Department of Public Works and Highways (DPWH) sa bayan ng San Andres, Quezon, ngayong araw, Oktubre 16, bilang bahagi ng kanilang programa para sa mas ligtas at maayos na daloy ng trapiko.

Katuwang ng DPWH sa proyekto sina Cong. Reynan Arrogancia, Gov. Helen Tan, Mayor Ralph Lim, at ang Sangguniang Bayan ng San Andres, na sama-samang nagbabantay at nagbibigay ng suporta upang maisakatuparan ang pagsasaayos sa Sitio Mabato at Sitio Tagbakan Road sa Barangay Pansoy.

Layunin ng proyekto na mapabuti ang accessibility at koneksyon ng mga barangay, lalo na sa mga lugar na madalas maapektuhan ng pag-ulan at landslide. Sa pamamagitan ng road clearing, inaasahang mababawasan ang panganib sa mga motorista at mas mapapabilis ang biyahe ng mga residente at negosyante.

Ayon sa DPWH, ang proyektong ito ay bahagi ng patuloy na infrastructure development sa lalawigan ng Quezon na isinusulong ng lokal at pambansang pamahalaan upang mapalakas ang ekonomiya at turismo ng rehiyon.

Ipinahayag naman ni Mayor Ralph Lim ang kanyang pasasalamat sa lahat ng ahensya at opisyal na nagkakaisa para sa ikauunlad ng bayan. Dagdag pa niya, ang ganitong mga proyekto ay patunay na ang pamahalaan ay seryoso sa paghahatid ng serbisyong totoo at tuloy-tuloy na pag-unlad para sa mga mamamayan ng San Andres. (Larawan: Mayor Ralph Lim / Facebook)