DISYEMBRE 2, 2025 — Posibleng nakaligtas sa mas mabigat na parusa si Cavite 4th District Rep. Francisco “Kiko” Barzaga matapos niyang burahin ang 24 na kontrobersyal na social media post na naging ugat ng kanyang kasong etika sa Kamara.

Noong Lunes, Disyembre 1, bumoto ang 249 na miyembro ng House of Representatives pabor sa 60-araw na suspensyon laban sa neophyte solon, habang lima ang tumutol at 11 ang nag-abstain. Kasama sa desisyon ng plenaryo ang direktiba na alisin ni Barzaga ang mga post sa loob ng 24 oras mula sa pag-adopt ng rekomendasyon ng Committee on Ethics and Privileges.

Ang mga tinanggal na post ay kinabibilangan ng mga mapanirang komento laban sa matataas na opisyal ng gobyerno, mga larawang itinuturing na bastos sa kababaihan, at mga pagpapakita ng labis na yaman.

Ayon kay 4Ps Party-list Rep. JC Abalos, chairman ng ethics panel, maaaring mas mabigat na parusa ang ipataw kung hindi sinunod ni Barzaga ang kautusan. “Harsher disciplinary action” (Mas mabigat na parusa) ang kanyang babala sa plenaryo.

Sa isang press conference, nilinaw ni Abalos na hindi minadali ang proseso at hindi ito naimpluwensyahan ng Pangulo, na madalas na target ng kritisismo ni Barzaga. 

“What we are disciplining is conduct unbecoming of a member. Kaya napakahalaga po ng ethics recommendation na na-adopt ng plenary because we have to draw a line between the genuine exercise of freedom of expression … kumpara sa conduct unbecoming of an elected official,” ani Abalos.

Ipinaliwanag pa ni Abalos na hindi maituturing na political speech ang mga larawang bastos o ang pagbibida ng salapi. 

“Pangalawa, ang nude photos, ang pagpapakita ng mga imahe na nakakabastos sa ating mga kababaihan, hindi po ‘yan political criticism or speech,” dagdag niya. 

Ang ethics complaint laban kay Barzaga ay inihain noong Setyembre 17 ng Deputy Speaker Ronaldo “Ronnie” Puno at 28 pang miyembro ng National Unity Party. Sa mga pagdinig, lumabas na personal na inaaprubahan ni Barzaga ang lahat ng nilalaman sa kanyang social media.

Bagama’t may mga kasapi ng komite na nainis sa madalas na pagka-late o pagliban ni Barzaga sa mga hearing, binigyan pa rin siya ng pagkakataong ipagtanggol ang sarili. 

“Noong nagkaroon po tayo ng adjudicatory hearing, nag-file siya ng motion for postponement kasi may sakit po ang kanyang abogado. Yung ginawa po ng committee, nag-schedule kami ng special hearing para masigurado na nandun ‘yung karapatan niyang ma-cross examine ang testigo ng mga complainant,” paliwanag ni Abalos. 

Sa ngayon, nananatiling suspensyon ang pinakamataas na parusang naipatupad laban kay Barzaga. Ngunit ayon kay Abalos, nakalatag pa rin ang posibilidad ng expulsion kung muling lalabag ang mambabatas. 

“It (expulsion) is always an option because that's enumerated under our rules as well as the Constitution,” aniya. 

(Laging opsyon ang expulsion dahil nakasaad ito sa ating rules at sa Konstitusyon.)

(Larawan: Congressman Kiko Barzaga | Facebook)