MANILA, Philippines — Nanawagan si Greco Belgica, dating opisyal ng pamahalaan at anti-corruption advocate, na tuluyan nang buwagin ang real property tax o mas kilala bilang amilyar sa buong bansa, iginiit na hindi na ito makatarungan para sa mga Pilipinong may-ari ng lupa at tahanan.

Ayon kay Belgica, hindi umano makatuwiran na patuloy na singilin ng gobyerno ang mamamayan ng taunang buwis sa lupang legal na nilang pagmamay-ari. Aniya, sa oras na nabili o nakuha na ng isang indibidwal ang lupa sa legal na paraan at nakapagbayad na ng kaukulang buwis at bayarin, hindi na dapat ito paulit-ulit na binubuwisan taon-taon.

“Maraming Pilipino ang halos hindi na makasabay sa taas ng presyo ng bilihin, kuryente, tubig, at iba pang pangunahing pangangailangan. Ang amilyar ay dagdag pasanin lalo na sa mahihirap at middle class na pamilya,” pahayag ni Belgica. Dagdag pa niya, may mga pagkakataon umano na nawawalan ng sariling bahay o lupa ang isang pamilya dahil sa hindi nabayarang amilyar, bagay na aniya’y malinaw na hindi makatao.

Binigyang-diin din ni Belgica na bagama’t ginagamit ng mga lokal na pamahalaan ang koleksiyon mula sa real property tax para pondohan ang mga proyekto at serbisyong panlipunan, dapat umanong maghanap ang gobyerno ng alternatibong paraan ng kita na hindi direktang nagpapahirap sa karaniwang mamamayan. Kabilang dito ang mas mahigpit na paniningil ng buwis sa malalaking korporasyon, luxury properties, at mga hindi nagbabayad ng tamang buwis.

Umani ng iba’t ibang reaksyon ang panukala ni Belgica mula sa publiko. May mga sumuporta sa panawagan, lalo na ang mga senior citizen at mababang kita na sektor, habang may ilan namang nagsabing mahirap itong ipatupad dahil malaking bahagi ng pondo ng mga LGU ang nagmumula sa amilyar. Sa kabila nito, iginiit ni Belgica na panahon na upang muling suriin ang umiiral na sistema ng pagbubuwis sa ari-arian, at unahin ang kapakanan at dignidad ng mamamayang Pilipino. (Larawan: Greco Belgica / Facebook)