June 12 - Naitakas ng Converge FiberXers ang isang mahalagang panalo kontra San Miguel Beermen, 100-97, sa PBA Philippine Cup elimination game nitong Miyerkules sa Ninoy Aquino Stadium, Maynila.

Sa panalong ito, pansamantalang naantala ng Converge ang pagkamit ng twice-to-beat advantage ng San Miguel, na nananatili sa ikalawang puwesto taglay ang 7-3 kartada.

Sa kabilang banda, tinapos ng FiberXers ang elimination round na may 7-4 record at may tsansang umusad sa Top 4, depende sa resulta ng natitirang mga laro ng ibang koponan.

“Napakatinding laban. Alam nating contender talaga ang San Miguel. Pero maganda ang simula natin, kahit may comeback sila, nakabawi pa rin tayo. Para sa batang team tulad natin, malaking bagay ang ganitong klaseng laban,” pahayag ni Converge head coach Franco Atienza.

Nanguna si Schonny Winston para sa FiberXers na may 25 puntos, apat na rebounds, apat na assists, dalawang steals at isang block mula sa bench. May ambag ding 21 puntos si Justin Arana.

Lumamang ng hanggang 18 puntos ang Converge, 55-37, sa pagbubukas ng ikatlong yugto ngunit unti-unting bumalik ang San Miguel at napalapit sa 68-69.

Umabante pa ang Beermen sa fourth quarter, 85-76, matapos ang tres ni Mo Tautuaa, pero hindi nagpatinag ang FiberXers at nagsanib-puwersa para sa 21-8 run na nagbigay sa kanila ng 97-93 kalamangan sa likod ng tres ni JL delos Santos.

Naglagay ng tatlong puntos na abante si Delos Santos, 100-97, matapos ang isang free throw may 3.3 segundo na lang ang natitira. Nagkaroon pa ng tsansang maitabla ang San Miguel ngunit mintis ang tres ni CJ Perez sa kaliwang sulok.

May 13 puntos si Delos Santos, habang tig-pitong puntos sina Alec Stockton at Justine Baltazar bagama’t pinagsamang 4-of-21 lamang ang shooting nila sa laro.

Pinangunahan naman nina June Mar Fajardo at CJ Perez ang San Miguel na may tig-17 puntos, habang nagdagdag si Tautuaa ng 14, Juami Tiongson ng 13, at Kris Rosales ng 11.

Isang laro na lang ang natitira para sa Beermen sa eliminations — laban sa NorthPort Batang Pier.