PHUKET, Thailand — Nagdulot ng matinding abala sa trapiko ang karambola ng 15 sasakyan sa ilalim ng Dara Samut Intersection tunnel sa Phuket nitong nakaraang araw. Isang tao ang iniulat na nasaktan matapos makaranas ng pananakit ng dibdib at hirap sa paghinga, at agad na dinala sa ospital.

Ayon sa ulat ng pulisya, isang 18-wheeler trailer truck ang nawalan ng preno habang bumabaybay sa tunnel bandang alas-11:47 ng umaga. Dahil dito, sunod-sunod na sumalpok ang malalaking sasakyan at pribadong kotse, dahilan ng pinsala at pagkakabalandra ng trapiko sa ilalim ng underpass.

Agad na nagtungo sa lugar si Pol. Col. Somsak Thongkliang, Superintendent ng Wichit Police Station, kasama si Pol. Lt. Col. Wutthiwat Liangbunchinda, Deputy Superintendent, at mga traffic police officers upang imbestigahan ang insidente. Sila rin ang nanguna sa mabilis na paglilinis ng lugar para maibalik ang daloy ng trapiko.

Tumagal ng higit isang oras bago naialis ang mga nawasak na sasakyan at maibalik sa normal ang biyahe sa daraanan.

Kasabay ng clearing operations, iniimbestigahan na rin ng mga awtoridad ang driver ng trailer truck na sinasabing nawalan ng preno. Tinitingnan kung may pananagutan ito sa reckless driving o kapabayaan na humantong sa aksidente.

Nagdulot ng mabigat na trapik ang insidente, lalo na sa mga oras ng tanghali, ngunit agad ding naibsan matapos ang paglilinis. Wala namang naiulat na nasawi.

Sa ngayon, nagpapatuloy ang imbestigasyon ng pulisya upang matukoy ang puno’t dulo ng aksidente, at tiniyak ng mga awtoridad na paiigtingin ang inspeksyon sa mga truck at heavy vehicles na bumabaybay sa mga pangunahing kalsada ng Phuket.

larawan/google