SETYEMBRE 23, 2025 — Nagpahayag ang White House nitong Lunes na ang bersyon ng TikTok sa Amerika ay gagamit ng sariling algorithm na gawa ng mga Amerikano — isang hakbang na posibleng magligtas sa app mula sa tuluyang pagbabawal sa bansa.

Matagal nang tinutuligsa ng mga mambabatas sa Amerika ang TikTok, na pag-aari ng Chinese firm na ByteDance, dahil sa pangambang ginagamit ito ng Beijing para mangalap ng datos ng mga Amerikano at magpakalat ng impluwensiya gamit ang makapangyarihang content algorithm nito.

Bunga ng batas na ipinatupad sa ilalim ng administrasyon ni Pangulong Donald Trump, napilitan ang ByteDance na ibenta ang operasyon nito sa Amerika o harapin ang pagbabawal sa app sa pinakamalaking merkado nito.

Ayon sa isang senior na opisyal ng White House, ililipat ang operasyon ng TikTok sa isang bagong kumpanya sa Amerika na pamumunuan ng mga Amerikanong direktor. Ang Oracle, isang higanteng kumpanya sa cloud computing, ang itatalaga bilang tagapangalaga ng seguridad ng algorithm upang matiyak na walang impluwensiyang Tsino ang makakapasok.

Sinabi ng opisyal na ang algorithm ay “going to be fully inspected and retrained by the security provider on US user data, and then it's going to be operated by that US entity” (lubusang susuriin at muling sasanayin ng tagapangalaga ng seguridad gamit ang datos ng mga gumagamit sa Amerika, at pagkatapos ay pamamahalaan ito ng kumpanyang Amerikano).

Dagdag pa ng opisyal, patuloy itong babantayan upang matiyak na hindi ito naaapektuhan ng panlabas na impluwensiya.

Ang update ay lumabas ilang araw matapos ang ikalawang pag-uusap sa telepono nina Trump at Chinese President Xi Jinping mula nang bumalik si Trump sa pagkapangulo. Ayon sa White House, inaasahang pipirma si Trump ng executive order ngayong linggo upang pagtibayin ang kasunduan bilang tugon sa mga alituntunin ng pambansang seguridad.

Sa panayam ng Fox News, sinabi ni White House Press Secretary Karoline Leavitt na “there will be seven seats on the board that controls the app in the United States, and six of those seats will be Americans” (magkakaroon ng pitong upuan sa board na mamamahala sa app sa Amerika, at anim sa mga ito ay mga Amerikano.)

Bukod sa Oracle, inaasahang makikisali rin sa pamumuhunan sina Rupert Murdoch at anak niyang si Lachlan, pati na ang mga venture capital firm na Andreessen Horowitz at Silver Lake.

Tahimik naman ang Beijing sa usapin, maliban sa pahayag ng state broadcaster na CCTV na nagsasabing, “The Chinese government respects the will of enterprises and welcomes them to conduct business negotiations based on market rules.” 

(Iginagalang ng pamahalaang Tsino ang kagustuhan ng mga negosyo at tinatanggap ang negosasyon batay sa mga patakaran ng merkado.)

(Larawan: Philippine News Agency)