Tokyo, Japan — Yumao sa edad na 29 si Haru Urara, ang kilalang racehorse ng Japan na tinaguriang “the shining star of losers everywhere”, matapos bawian ng buhay dahil sa colic noong Setyembre 9, 2025 sa Martha Farm, Onjuku, Chiba.

Si Haru Urara ay sumikat noong unang bahagi ng 2000s matapos siyang makilala bilang kabayong hindi kailanman nanalo sa alinman sa kanyang 113 karera mula 1998 hanggang 2004. Sa kabila nito, naging pambansang simbolo siya ng determinasyon at pagpupursige, at minahal ng publiko dahil sa kanyang matatag na pagharap sa pagkatalo.

Si Haru Urara ay ipinanganak noong Pebrero 27, 1996 sa Hokkaido at anak ni Nippo Teio, isang napakahusay na kabayong pangkarera. Ang kanyang pangalan ay nangangahulugang "Gentle springs" o "Glorious Spring" sa Hapon.

Noong kasagsagan ng kanyang kasikatan, dumagsa ang libo-libong manonood upang makita siyang lumaban, kabilang pa ang dating Punong Ministro na si Junichiro Koizumi na nagpahayag ng suporta. Lumabas din ang kanyang imahe sa mga merchandise tulad ng phone straps, stuffed toys, at maging sa omamori charms na ibinebenta sa mga racecourse.

Muling sumikat si Haru Urara sa makabagong henerasyon matapos siyang maging inspirasyon ng isang karakter sa sikat na video game at anime series na Umamusume: Pretty Derby. Dahil dito, nakatanggap pa siya ng libu-libong kilo ng damo mula sa fans sa buong mundo bilang donasyon, isang patunay ng kanyang patuloy na impluwensya.

Sa kanyang pagpanaw, ipinahayag ng mga tagapangalaga at fans ang kanilang kalungkutan, subalit nananatili ang kanyang legacy bilang simbolo ng pag-asa—na kahit sa harap ng paulit-ulit na pagkatalo, may tagumpay pa ring makakamtan sa inspirasyong naibabahagi sa iba.

larawan/google