HUNYO 16, 2025 — Inilunsad ng Department of Education (DepEd) ang bagong academic year kasabay ng pilot test ng binagong senior high school (SHS) curriculum, habang milyun-milyong estudyante ang bumalik sa mga silid-aralan nitong Lunes. Pinaikli ang curriculum — mula 15 core subjects, naging lima na lang, na ituturo sa loob ng dalawang semestre para mas madaling matutunan at hindi mabigatan ang mga estudyante.

Ite-test ng 841 na paaralan sa buong bansa ang updated na curriculum, na nagbibigay-prioridad sa Essential Communication, Life and Career Skills, General Math, General Science, at Filipino History and Society. Ayon sa DepEd, mas makakapaghanda ito ng mga graduate para sa kolehiyo at trabaho, pero binabalaan ng mga guro ang patuloy na kakulangan sa mga kagamitan.

Pahayag ni Benjo Basas ng Teachers’ Dignity Coalition, "Reports from the field show that some schools participating in the SHS pilot are not adequately supported to deliver the new curriculum effectively."

(Ayon sa mga ulat, kulang ang suporta sa ilang paaralang sumasailalim sa pilot test ng SHS para maipatupad nang maayos ang bagong curriculum.)

Kabilang sa mga problema ang kulang na textbook, siksikang silid-aralan, at hindi sapat na palikuran. Nagpahayag din ng pangamba ang mga estudyante sa pagbawas ng budget sa edukasyon, na anila’y nakakaapekto sa kalidad ng pag-aaral.

Tutol si Iya Trinidad ng National Union of Students of the Philippines sa prayoridad ng gobyerno, lalo’t kulang ang pondo para sa mga pasilidad at kaligtasan sa mga paaralan.

Nangako naman ang DepEd ng 20,000 bagong teaching positions para mabawasan ang labis na estudyante sa bawat klase. Para sa seguridad, mahigit 37,000 pulis ang nakaantabay malapit sa mga paaralan, samantalang tumutulong ang mga volunteer sa last-minute repairs.

Bagama’t itinuturing ng mga opisyal ang curriculum na isang hakbang pasulong, iginiit ng mga guro at estudyante — ang tunay na pag-unlad ay nasa pagtugon sa matagal nang problema sa edukasyon.

(Larawan: Facebook)