AGOSTO 1, 2025 — Binuksan noong Miyerkules ang kauna-unahang artificial intelligence (AI) laboratory sa isang pampublikong paaralan sa bansa — ang Dansolihon National High School (DNHS) sa isang Indigenous Peoples (IP) community sa Cagayan de Oro.

Itinayo ang pasilidad sa tulong ng lokal na pamahalaan at ng tech firm na Skunkworks, na nagbibigay ng training sa AI, coding, drone operations, at digital literacy. Ayon kay Skunkworks president Thor Turecha, layon nitong bigyan ng maagang exposure sa teknolohiya ang mga mag-aaral, lalo na ang mga Lumad.

“This is not just a school or a lab. It’s a launchpad for innovation,” pahayag ni Turecha.

(Hindi lang ito isang paaralan o laboratoryo. Ito ay isang launchpad para sa inobasyon.)

Pinangunahan ni Mayor Rolande Uy ang proyekto bilang chair ng Local School Board, kasama ang DepEd at iba pang ahensya. Ayon kay DepEd City Division Superintendent Rey Angelo Gazo, malaking hakbang ito para sa pagpapalawig ng innovation sa edukasyon.

Bago ang launch, sumailalim sa intensive training ang mga guro ng DNHS sa ilalim ng Skunkworks. Napili ang paaralan dahil sa kultura nitong pinangangalagaan ng mga Lumad na estudyante.

Plano ring magtayo ng pangalawang AI hub sa City Central School bago matapos ang taon. Samantala, sinuportahan ng Department of Information and Communications Technology (DICT) ang digitalization efforts sa rehiyon.

“We are here to support you in transforming trust into real impact,” pahayag ni DICT Misamis Oriental officer Nideliza Nacilla sa isang orientation para sa mga bagong halal na opisyal.

(Nandito kami para tulungan kayong gawing realidad ang pagbabago.)

Ang proyekto ay bahagi ng mas malawak na adhikain na gawing "Creative Technology Capital of the Philippines" ang Cagayan de Oro.

(Larawan: MetroCDODev)