AGOSTO 1, 2025 — Magdaraos ng kauna-unahang joint maritime exercise ang Philippine Navy at Indian Navy sa West Philippine Sea sa susunod na linggo, ayon sa Armed Forces of the Philippines (AFP). Layunin umano nitong palakasin ang seguridad at kooperasyon sa isa sa pinaka-mainit na disputed waters sa Asya.

Dumating na rin sa Maynila ang Indian naval tanker na INS Shakti noong Huwebes bilang bahagi ng paghahanda sa aktibidad. 

Ayon kay AFP Chief Gen. Romeo Brawner Jr., "This is more than a ceremonial gesture. The presence of INS Shakti in Manila sends a powerful signal of solidarity, strength in partnership, and the energy of cooperation between two vibrant democracies in the Indo-Pacific."

(Higit pa ito sa isang seremonyal na pagpapahayag. Ang presensya ng INS Shakti sa Maynila ay nagpapadala ng malakas na mensahe ng pagkakaisa, lakas ng pakikipagtulungan, at sigla ng ugnayan sa pagitan ng dalawang aktibong demokrasya sa Indo-Pacific.)

Sakto rin ang joint sail sa state visit ni Pangulong Ferdinand Marcos Jr. sa India simula Agosto 4-8, kung saan tatalakayin ang mas malalim na ugnayan sa depensa.

Noong 2022, bumili ang Pilipinas ng BrahMos missiles mula sa India sa halagang $375 milyon, at ngayon ay pinag-uusapan na rin ang posibleng $200-milyong deal para sa Akash missile system.

Sa gitna ng patuloy na tensyon sa West Philippine Sea, iginiit ng AFP na hindi magsasawang makipag-ugnayan sa mga kaalyado upang masiguro ang kalayaan at seguridad ng rehiyon. Ayon kay Brawner, ang aktibidad na ito ay hindi lamang isang pagsasanay kundi isang kongkretong hakbang upang ipakita ang kahandaan ng bansa na protektahan ang soberanya nito.

Ang joint patrol na ito ang pinakabagong hakbang ng Pilipinas para palakasin ang depensa, kasabay ng patuloy na pagharap sa mga hamon mula sa China.

(Larawan: Armed Forces of the Philippines)