Setyembre 25, 2025 – Tumanggi si Orly Regala Guteza, dating security aide ni Rep. Zaldy Co, na sumailalim sa Witness Protection Program (WPP) ng Department of Justice sa kabila ng kanyang pagbubunyag sa umano’y iregularidad sa mga flood control projects na iniimbestigahan ng Senado.

Sa pagdinig ng Senate Blue Ribbon Committee nitong Huwebes, diretsahang tinanong ni Senador Ronald “Bato” dela Rosa kung handa ba siyang tanggapin ang alok ng proteksyon ng pamahalaan. Ngunit iginiit ni Guteza na hindi niya ito kailangan.

“Hindi po ako papasok sa kahit anong protection program. Wala po akong takot. Ang importante, masabi ko ang totoo,” pahayag ni Guteza sa harap ng mga senador.

Bilang tugon, pinuri siya ni Dela Rosa sa kanyang ipinakitang tapang. Ayon sa senador, karaniwang humihiling ng proteksyon ang mga whistleblower na may hawak ng sensitibong impormasyon laban sa mga makapangyarihang opisyal. “Kakaiba ka, Mr. Guteza. Bihira ang ganyan na hindi natatakot at handang magsalita ng diretso kahit walang proteksyon,” ani Dela Rosa.

Nagbigay-diin din si Dela Rosa na nananatiling bukas ang Senado at ang DOJ para magbigay ng proteksyon kay Guteza kung sakaling magbago ang kanyang isip, lalo na’t lumalabas ang mga pangalan ng ilang mambabatas at dating mataas na opisyal sa mga alegasyon.

Samantala, nagpapatuloy ang Senate Blue Ribbon Committee sa pagbusisi sa mga alegasyon ng korapsyon sa flood control projects. Nakatuon ang imbestigasyon sa umano’y “kickback scheme” kung saan daan-daang milyong piso ang napupunta umano sa ilang mambabatas kapalit ng pag-apruba at implementasyon ng mga proyekto.

Ang desisyon ni Guteza na tumangging humingi ng proteksyon ay naglatag ng tanong hinggil sa kaligtasan ng mga testigo at whistleblower sa mga kaso ng katiwalian na kinasasangkutan ng mga makapangyarihang personalidad sa gobyerno.