MANILA — Nanawagan si Senador Jinggoy Estrada kay Sarah Discaya, dating kandidato sa pagka-alkalde ng Pasig City, na pangalanan ang kanyang umano’y “contact” sa Department of Public Works and Highways (DPWH) na tumulong sa kanyang kumpanya upang makakuha ng mga kontrata para sa flood control projects.

Sa panayam ng ANC, sinabi ni Estrada: “Well, first of all, I will ask her, sino ba ang kontak mo diyan sa DPWH? How come you garnered a lot [of] contracts there?”

Pinaghihinalaan ni Estrada ang posibleng sabwatan sa pagitan ng ilang contractor at opisyal ng DPWH, matapos matuklasan na 15 kumpanya lamang ang nakakuha ng karamihan sa mga flood control projects sa bansa. Isa sa mga kumpanyang ito ay pag-aari umano ng mag-asawang Pacifico at Sarah Discaya, kabilang ang St. Timothy Construction na nasangkot sa kontrobersyal na proyekto sa Bulacan na hindi pa rin tapos matapos ang mahigit dalawang taon.

Ani Estrada, “Collusion, number 1, pangalawa, siguro nag-aaadvance na itong mga contractor sa mga opisyal ng DPWH... Siguro yayariin nila yung bidding.”

Kasunod nito, hiniling ni Estrada sa Senate Blue Ribbon Committee na maglabas ng warrant of arrest laban sa mga contractor na patuloy na umiiwas sa pagdalo sa imbestigasyon ng Senado. Kinumpirma ni Senate President Francis Escudero na nilagdaan na niya ang mga subpoena para sa mga contractor, kabilang si Discaya, upang piliting dumalo sa susunod na pagdinig sa Setyembre 1.

Ang imbestigasyon ay bahagi ng mas malawak na pagsisiyasat sa umano’y anomalya sa flood mitigation projects, na unang binigyang pansin ni Pangulong Ferdinand Marcos Jr. matapos makita ang mga substandard na istruktura sa Bulacan at iba pang lalawigan.

Patuloy ang panawagan ng mga senador para sa transparency at accountability sa mga proyekto ng DPWH, lalo na’t bilyong piso ang nakataya sa mga kontratang ito.