Manila – Humihiling ang grupong Akbayan! Youth - UST sa komunidad ng University of Santo Tomas (UST) na ideklarang Persona Non Grata si Senador Joel Villanueva, kasunod ng mga alegasyon ng pagkakasangkot sa korapsyon sa mga proyekto ng flood control sa bansa.

Ayon sa petisyon na inilabas ng grupo, iniulat sa isang kamakailang pagdinig sa Senado na umano’y nakalikom si Villanueva ng higit ₱600 milyon mula sa pondong pampubliko, kung saan may tinatayang 30% cut na ipinapalagay na para sa personal na kapakinabangan. Ang naturang ulat ay nagdulot ng malawakang pag-aalala sa mga sektor na naniniwala sa transparency at integridad ng pamahalaan.

Dagdag pa ng grupo, hindi ito ang unang pagkakataon na may kasong isinampa laban kay Villanueva. Noong 2016, siya ay iniindict ng Ombudsman dahil sa maling paggamit ng higit ₱10 milyon para sa isang “ghost livelihood project,” na naglalayong magbigay ng tulong sa mga mamamayan ngunit hindi naipamahagi sa tama. Ayon sa Akbayan! Youth - UST, ang ganitong mga insidente ay malinaw na paglabag sa mga pamantayang etikal at moral na pinanghahawakan ng Unibersidad.

“Bilang mga Thomasians, tungkulin natin na panindigan ang mga pagpapahalagang tulad ng katapatan, integridad, at pananagutan. Hindi natin dapat palampasin ang pagkakataong ipanagot sa batas ang sinumang opisyal ng gobyerno na inaabuso ang tiwala ng mamamayan at ginagamit ang pondo ng bayan para sa pansariling kapakinabangan,” ayon sa pahayag ng grupo.

Nanawagan ang Akbayan! Youth - UST sa buong komunidad ng UST na maging aktibo sa paghahanap ng katarungan at panagutin ang mga opisyal ng gobyerno sa maling paggamit ng pondo ng bayan, lalo na ang mga pondong nagmumula sa hirap at sakripisyo ng ordinaryong Pilipino.

Ang hakbang na ito ay bahagi ng mas malawak na kilusan ng mga kabataan at alumni na naninindigan sa prinsipyo ng integridad, lalo na sa harap ng mga alegasyon ng katiwalian na maaaring magdulot ng malaking pinsala sa mga proyekto para sa kapakanan ng publiko.

Larawan mula sa Akbayan Youth - UST