MANILA — Sa isang emosyonal na pagharap sa Senate Blue Ribbon Committee, isinapubliko ng dating District Engineer ng Department of Public Works and Highways (DPWH) na si Henry Alcantara ang umano’y malawakang “fund-sharing scheme” sa mga flood control projects mula 2022 hanggang 2025. Sa kanyang tell-all statement, inilahad niya kung paano dumadaloy ang pondo at kung paanong ilang opisyal at mambabatas ay nasasangkot.

Usec. Yusef Bernardo: Ang “Pondo Broker”

Ayon kay Alcantara, nagsimula ang pagpasok ng pondo sa kanyang distrito noong 2022 sa pamamagitan ni Usec. Yusef Bernardo. Aniya, si Bernardo ang nagtakda ng “25 percent para sa proponent” sa bawat proyektong binababa.

• 2022: P350M ang pondo para sa kanyang District Office (DO).
  
  
• 2023: Umabot sa P710M, kung saan P450M ay mula sa National Expenditure Program (NEP) at P260M mula sa General Appropriations Act (GAA).
  
  
• 2024: Nakasaad na nagkaroon ng P300M para sa mga proyekto sa Bulacan.
  
  

Sinabi rin ni Alcantara na si Bernardo ang nag-utos ng advance payments, na minsan ay dinadala raw sa mga hotel at pribadong bahay.

Sen. Bong Revilla: P300M Flood Control Projects

Pinangalanan din ni Alcantara si Sen. Bong Revilla, na umano’y tinaguriang benepisyaryo ng P300M na flood control projects noong 2024.

Kasama rito ang tatlong proyekto sa Bulacan:

• Flood control sa Angat River (Sipat Section, Plaridel)
  
  
• Flood control sa Angat River (Lumang Bayan Section)
  
  
• Flood control sa Giginto River (Malis Section, Giginto)
  
  

Bagaman iginiit ni Alcantara na hindi niya personal na nakausap si Revilla, sinabi niyang ipinakilala sa kanya ang pondo bilang para sa senador.

Sen. Joel Villanueva: P150M “Tulong Proyekto”

Isiniwalat din ni Alcantara na noong 2024, nagbigay ng direktiba si Usec. Bernardo na bigyan si Sen. Joel Villanueva ng proyektong nagkakahalaga ng P150M.

Aniya, hindi alam ni Villanueva na flood control ang proyekto dahil ayon kay Alcantara, “ayaw ni Sen. Joel ng flood control projects.” Inilarawan niya ito bilang simpleng tulong para sa “future plans” ng senador.

Sen. Jinggoy Estrada: P355M Pumping Stations

Sa 2024 budget hearing, binanggit ni Alcantara na isinama si Sen. Jinggoy Estrada sa listahan ng may P355M na halaga ng pumping station projects.

Aniya, hindi siya nagkaroon ng direktang transaksyon kay Estrada, ngunit idinaan ang listahan sa pamamagitan ni Usec. Bernardo. Ang proyekto ay tumutukoy sa flood control pumping stations na may iba’t ibang phases.

Rep. Zaldy “Cong Zaldy” Co: Bilyong-Bilyong Pondo

Pinaka-matindi umano ang naging papel ni Rep. Zaldy Co, na ayon kay Alcantara ay may kabuuang P35B halaga ng proyekto mula 2022 hanggang 2025.

Ibinunyag niya na regular siyang naghahatid ng “25 percent para kay Kong Saldi,” kadalasan sa parking lot ng Shangri-La Hotel sa BGC o minsan sa mismong bahay ng kongresista sa Pasig.

Dagdag pa ni Alcantara, lumaki ang alokasyon ng pondo para kay Co hanggang umabot sa halos P14B noong 2024.

Alcantara: “Handa akong makipagtulungan”

Sa huli, sinabi ni Alcantara na ang kanyang pagsisiwalat ay ginawa “upang ipakita ang kusang loob na makipagtulungan” at maituwid ang maling sistema. Inilakip din niya ang annex ng kanyang sinumpaang salaysay na naglalaman ng listahan ng mga proyekto at halaga.

Paalala: Ang lahat ng alegasyon ay nakabatay sa pahayag ni dating District Engineer Henry Alcantara at kasalukuyang iniimbestigahan pa ng Senado.