CEBU — Nagtamo ng pinsala ang ilang kalsada sa Cebu matapos tumama ang Magnitude 6.7 na lindol ngayong gabi. Nakuhanan ng larawan at video ang mga bitak sa daan na agad na kumalat sa social media, dahilan upang magdulot ng matinding pangamba sa mga residente.

Ayon sa Phivolcs, ramdam ang malakas na pagyanig sa malaking bahagi ng Central Visayas at umabot pa hanggang Bicol Region. Patuloy namang nararanasan ang mga aftershock, kaya’t nagmamadaling nagsilabasan ang mga tao mula sa kanilang mga bahay at establisyemento para makaiwas sa posibleng panganib.

Sa ngayon, wala pang opisyal na ulat ng nasawi o nasugatan, ngunit nagbabala ang mga awtoridad na mag-ingat sa mga landslide, lalo na sa mga lugar na bulubundukin at malapit sa baybayin.

Nagpapatuloy ang assessment ng lokal na pamahalaan at disaster response teams upang matukoy ang lawak ng pinsala. Pinayuhan ang mga motorista na umiwas muna sa mga apektadong kalsada at sumunod sa mga traffic advisories.

Nanawagan ang mga opisyal na manatiling alerto at handa habang nagpapatuloy ang monitoring ng posibleng mga aftershock.

Paalala: Manatiling kalmado, maghanda ng emergency kit, at huwag basta maniwala sa mga hindi beripikadong impormasyon sa social media. (Larawan: Screengrab from Maeloujen Garlet Ler video / Facebook)