MANILA — Arestado ang isang negosyante sa Maynila matapos mahuling nagbebenta ng mga relief goods na nakatakda sanang ipamahagi ng Department of Social Welfare and Development (DSWD) sa mga biktima ng lindol sa Cebu.

Ayon sa ulat ng DSWD at Manila Police District (MPD), isinagawa ang operasyon sa isang tindahan sa Sampaloc, Maynila noong Oktubre 2, matapos makatanggap ng tip mula sa isang concerned citizen. Nakumpiska sa lugar ang daan-daang family food packs na may malinaw na tatak ng DSWD, kabilang ang bigas, de lata, instant noodles, at bottled water.

“We are deeply alarmed by this incident. These goods are meant for disaster survivors, not for profit,” pahayag ni DSWD Secretary Rex Gatchalian. Dagdag pa niya, iniimbestigahan na kung paano nakalabas ang mga relief items mula sa opisyal na supply chain ng ahensya.

Kinilala ang suspek bilang si alyas “Tony,” may-ari ng isang maliit na grocery store. Ayon sa MPD, posibleng may kasabwat ito sa loob ng ahensya o sa lokal na pamahalaan. “We are not ruling out the possibility of internal collusion. We will dig deeper,” ayon kay MPD Chief Brig. Gen. Arnold Thomas.

Ang suspek ay nahaharap sa kasong paglabag sa Republic Act No. 10121 o ang Philippine Disaster Risk Reduction and Management Act, at Republic Act No. 7394 o Consumer Act of the Philippines. Maaari rin siyang kasuhan ng qualified theft at obstruction of government relief operations.

Samantala, nanawagan ang DSWD sa publiko na agad i-report ang mga kahina-hinalang bentahan ng relief goods. “These items are not for sale. If you see them in stores or online, please report it to us,” giit ng ahensya.

Ang insidente ay naganap sa gitna ng patuloy na relief operations para sa mga biktima ng magnitude 6.9 na lindol sa Cebu, kung saan higit sa 72 katao ang nasawi at libu-libo ang nawalan ng tirahan.

Larawan mula CIDG