OKTUBRE 7, 2025 — Isang araw matapos ang pagbitiw ni Senador Panfilo “Ping” Lacson bilang pinuno ng Senate Blue Ribbon Committee, lumutang ang limang pangalan na posibleng humalili sa kanya sa puwesto.

Kinumpirma ni Senate President Vicente “Tito” Sotto III na kabilang sa mga ikinokonsidera sina Senators JV Ejercito, Raffy Tulfo, Pia Cayetano, Francis “Kiko” Pangilinan, at Risa Hontiveros. Ayon kay Sotto, hindi kinakailangang abogado ang susunod na uupo sa komite.

“Depende. Pwede later, finalize bukas,” ani Sotto patungkol sa inaasahang desisyon ng majority bloc sa caucus na itinakda kinabukasan.

Ang Blue Ribbon Committee, na pormal na tinatawag na Senate Committee on Accountability of Public Officers and Investigations, ang pangunahing sangay ng Senado na tumutok sa mga alegasyon ng katiwalian sa pamahalaan. Kasalukuyang nakabinbin ang mga imbestigasyon ukol sa mga iregularidad sa flood control projects at iba pang gastusin sa imprastraktura.

Nagbitiw si Lacson sa gitna ng kontrobersya sa direksyon ng mga pagdinig ng komite. Sa kanyang liham na may petsang Oktubre 7, mariin niyang itinanggi ang mga paratang na may halong pulitika ang kanyang pamumuno.

“Nothing could be further from the truth. This narrative is categorically false. These misrepresentations are being floated mostly by critics opposed to our efforts to get to the bottom of the flood control anomalies,” pahayag ni Lacson. 

(Walang katotohanan ito. Mali ang ganitong kwento. Pinalalaganap ito ng mga kritiko na tutol sa pagsisiyasat namin sa mga anomalya sa flood control.)

Dagdag pa niya, “We go where the evidence leads us, not by the noise coming from highly partisan political persuasions … I do not need to amass political capital much less at the expense of anybody because I entertain no further political plans after my term ends in 2031.” 

(Sa ebidensya kami nakabatay, hindi sa ingay ng pulitika … Hindi ko kailangang mag-ipon ng kapital sa pulitika, lalo na kung may masasagasaan, dahil wala na akong planong tumakbo pagkatapos ng termino ko sa 2031.)

Sinubukan pa umano ni Sotto na kumbinsihin si Lacson na manatili, ngunit desidido na ito. 

“This resignation letter is a notice of leave. Hindi ito asking permission,” giit ni Sotto.

Sa kabila ng pagbitiw, nananatiling miyembro ng komite si Lacson. 

Samantala, sinabi ni Senador Jinggoy Estrada na maraming karapat-dapat sa puwesto, at binanggit si Cayetano bilang dating chair ng komite.

Ang magiging desisyon ng bagong uupo ay kritikal sa pagpapatuloy ng mga imbestigasyon.

(Larawan: Vicente Tito Sotto | Facebook)