MANILA — Kinumpirma ng Philippine Institute of Volcanology and Seismology (PHIVOLCS) na ang magkasunod na malalakas na lindol na yumanig sa karagatan ng Manay, Davao Oriental ay kabilang sa tinatawag na doublet-type earthquake — isang bihirang pangyayari kung saan dalawang malalakas na lindol ang tumatama sa halos parehong lugar at oras.

Ayon sa ulat ng PHIVOLCS, ang unang pagyanig na naitala sa magnitude 7.4 ay sinundan ng isa pang lindol na magnitude 6.8 sa parehong rehiyon. Dahil sa halos magkaparehong lokasyon at mekanismo, itinuturing ito ng mga eksperto bilang isang “doublet,” o dalawang pangunahing lindol na naganap nang magkasunod.

Ipinaliwanag ng ahensya na ito ang unang pagkakataon mula noong 1992 na naitala ang ganitong uri ng lindol sa kahabaan ng Philippine Trench, isang malalim na bahagi ng karagatan na aktibong gumagalaw dahil sa subduction o paglusong ng Pacific Plate sa ilalim ng Philippine Sea Plate.

Noong 1992, dalawang malalakas na lindol din ang tumama sa parehong bahagi ng Davao Oriental, na nagdulot ng tsunami at malawakang pinsala sa rehiyon. Katulad ng kasalukuyang pangyayari, ang mga lindol noon ay inuri rin bilang doublet-type.

Dagdag ng PHIVOLCS, ang magkasunod na pagyanig ay bunga ng komplikadong paggalaw ng fault system sa ilalim ng Philippine Trench. Nilinaw rin ng ahensya na walang direktang koneksyon ang mga lindol na ito sa iba pang pagyanig na naitala kamakailan sa La Union at Cebu.

Patuloy naman ang monitoring ng PHIVOLCS at iba pang ahensya upang masuri ang mga aftershock at ang posibleng epekto ng mga paggalaw sa katatagan ng lupa at baybaying bahagi ng Davao Oriental.