MANILA — Inilunsad ng Government Service Insurance System (GSIS) ang bagong Digital Ginhawa Loan Program na layong tulungan ang mga kawani ng gobyerno na makabili ng mga digital tools tulad ng laptop, tablet, o cellphone para sa trabaho o pag-aaral.

Simula Oktubre 10, maaaring manghiram ng hanggang ₱60,000 ang mga kwalipikadong miyembro, na babayaran sa loob ng tatlong taon. Ang loan ay may mababang interes na 6% kada taon at walang service fee, ayon kay GSIS President at General Manager Wick Veloso.

“Alam natin ang realidad. Sa work-from-home at online learning, ang computers at gadgets ay pangangailangan na, hindi luho. Kaya inilunsad natin ang Digital Ginhawa Loan para matulungan ang ating mga miyembro na magkaroon ng mga kagamitan,” ani Veloso.

Ang aplikasyon ay eksklusibong isinasagawa sa pamamagitan ng GSIS Touch mobile app, na nagbibigay ng mabilis at paperless na proseso. Kapag naaprubahan, direktang ide-deposito ang loan proceeds sa GSIS UMID o eCard ATM account ng miyembro sa loob ng isa hanggang tatlong araw ng trabaho matapos ang kumpirmasyon ng awtorisadong opisyal ng ahensya.

Ang programang ito ay bahagi ng Digital Ginhawa for All (DGA) flagship initiative ng GSIS, na layong palawakin ang access sa digital tools para sa mga empleyado ng gobyerno sa gitna ng patuloy na digital transformation ng serbisyo publiko.