MANILA — Mariing iginiit ni Dasmariñas City Representative Francisco “Kiko” Barzaga na dapat patawan ng parusang kamatayan ang mga taong sangkot sa illegal logging at mining sa Sierra Madre Mountain Range, isa sa pinakamahalagang likas-yaman ng bansa.

Sa isang Facebook post noong Nobyembre 10, sinabi ni Barzaga: “There must be only one punishment for illegal logging and mining in important national environmental assets like Sierra Madre Mountain Range, and that is Death Penalty by firing squad.”

Ayon sa mambabatas, hindi sapat ang kasalukuyang mga parusa upang pigilan ang patuloy na pagkasira ng kalikasan. Aniya, ang Sierra Madre ay nagsisilbing natural barrier laban sa mga bagyo at mahalagang tagapangalaga ng biodiversity, kaya’t nararapat lamang na mahigpit na protektahan ito.

Bagamat matagal nang tinanggal ang death penalty sa Pilipinas noong 2006 sa pamamagitan ng Republic Act No. 9346, may tatlong panukalang batas sa Kamara na naglalayong ibalik ito para sa mga mabibigat na krimen. Gayunman, wala pa sa mga panukalang ito ang tumutukoy sa illegal logging o environmental destruction bilang sakop ng parusang kamatayan.

Ilang netizens ang nagpahayag ng suporta sa panukala ni Barzaga, habang ang iba naman ay nagtanong kung ang parusang kamatayan ay angkop para sa mga krimeng pangkalikasan. Sa kabila nito, nanindigan si Barzaga na ang matinding parusa ay kinakailangan upang mapigilan ang tuluyang pagkasira ng Sierra Madre.

Ang Sierra Madre, na bumabagtas mula Cagayan hanggang Quezon, ay tahanan ng maraming endangered species at nagsisilbing pangunahing proteksyon ng Luzon laban sa malalakas na bagyo. Sa mga nakaraang taon, paulit-ulit itong tinarget ng mga illegal loggers at miners, dahilan upang lumala ang pagbaha at landslide sa mga kalapit na lugar.

Patuloy ang diskusyon sa Kongreso ukol sa pagbabalik ng death penalty, ngunit nananatiling sensitibo ang usapin sa karapatang pantao at legalidad ng parusang kamatayan sa ilalim ng mga kasalukuyang batas at pandaigdigang kasunduan.