NOBYEMBRE 13, 2025 — Nagpalit ng liderato sa Bureau of Internal Revenue (BIR) matapos italaga ni Pangulong Ferdinand Marcos Jr. si Charlito Martin Mendoza bilang bagong komisyoner ng ahensya. Pinalitan niya si Romeo “Jun” Lumagui Jr., na biglaang umalis sa puwesto. Ang appointment paper ay pirmado noong Nobyembre 12.

Si Mendoza ay kasalukuyang undersecretary ng Department of Finance (DOF) Revenue Operations Group, na may direktang pangangasiwa sa BIR at Bureau of Customs (BOC). Noong 2024, isinama siya sa team ni Finance Secretary Ralph Recto upang pamunuan ang operasyon sa buwis at customs operations.

Bago nito, nagsilbi siyang district collector ng Port of Cebu mula 2019 hanggang 2022. Sa kanyang pamumuno, nakapagtala ang nasabing pantalan ng record-breaking collections at nakakuha ng ISO 9001:2015 certification — unang beses para sa alinmang distrito ng customs sa bansa.

Isang abogado mula San Beda University, nagtapos din si Mendoza ng Geodetic Engineering sa University of the Philippines. Noong 2004 Bar examinations, pumangatlo siya sa listahan ng topnotchers. Bukod sa serbisyo publiko, naging partner din siya sa isang law firm at lecturer sa bar review.

Samantala, nananatiling palaisipan ang biglaang pag-alis ni Lumagui sa BIR. Kilalang malapit siya sa pamilya Marcos at sa kanyang pamumuno ay lumago ang koleksyon ng ahensya. Mula P2.336 trilyon noong 2022, umakyat ito sa P2.852 trilyon noong 2024. Sa unang siyam na buwan ng 2025, nakapagtala ang BIR ng P2.32 trilyon — 11 porsiyentong mas mataas kumpara sa parehong panahon noong nakaraang taon. Target ng ahensya ang P3.219 trilyon para sa buong taon.

Hindi pa malinaw kung si Lumagui ay nagbitiw, tinanggal, o ililipat sa ibang posisyon.

(Larawan: Philippine News Agency)