DISYEMBRE 5, 2025 — Sa desisyon ng Sandiganbayan Sixth Division, pinawalang-sala si dating Philippine National Police (PNP) chief Alan Purisima kasama ang 16 pang akusado kaugnay ng kontrobersyal na kontrata sa Werfast Documentation Agency, Inc. noong 2011. Ayon sa korte, hindi napatunayan ng prosekusyon ang kasong graft “beyond reasonable doubt.”

Kasabay ng hatol, inalis din ng hukuman ang mga hold-departure order at hindi ipinataw ang anumang civil liability sa mga akusado. Pinangunahan ang desisyon ni Associate Justice Sarah Fernandez.

Matatandaang noong 2016, iniulat ng Office of the Ombudsman sa ilalim ni Conchita Carpio Morales na nakipagkasundo ang PNP sa Werfast para sa paghahatid ng mga lisensya sa baril. Sa Memorandum of Agreement na nilagdaan noong Mayo 2011, pinayagan ang kompanya kahit wala itong karanasan bilang courier service.

Lumabas din sa imbestigasyon na hindi isinailalim sa public bidding ang kontrata. Dagdag pa, gumamit ang Werfast ng serbisyo ng LBC at naningil ng P190 kada delivery sa Metro Manila — doble kumpara sa karaniwang P90 na singil ng ibang courier providers.

Kabilang sa mga co-accused ni Purisima ang mga dating opisyal ng PNP na sina Napoleon Estilles, Gil Meneses, Raul Petrasanta, Allan Parreño, Eduardo Acierto, Melchor Reyes, Lenbell Fabia, Sonia Calixto, Nelson Bautista, Ford Tuazon, at Ricardo Zapata Jr. Kasama rin ang mga incorporator ng Werfast na sina Mario Juan, Salud Bautista, Enrique Valerio, Lorna Perena, at Juliana Pasia.

Sa paglilitis, binigyang-diin ng korte na kulang ang ebidensiya ng prosekusyon upang patunayan ang sinasabing anomalya. 

“The prosecution failed to establish the guilt of the accused beyond reasonable doubt,” ayon sa desisyon. 

(Hindi napatunayan ng prosekusyon ang pagkakasala ng mga akusado lampas sa makatwirang pagdududa.)

Ang hatol na ito ay naglalagay ng tanong sa publiko hinggil sa proseso ng kontrata sa mga ahensya ng gobyerno, lalo na sa mga kasunduang hindi dumadaan sa tamang bidding. Sa kabila ng mga alegasyon, nananatiling malaya si Purisima at ang kanyang mga kasamahan mula sa kasong graft na matagal nang nakabinbin.

(Larawan: Philippine News Agency)