December 5, 2025 - Hihingi ng tulong ang Pilipinas sa pamahalaan ng Portugal upang maibalik sa bansa si dating Ako Bicol Party-list Rep. Zaldy Co, na iniulat na nasa Portugal matapos masangkot sa kontrobersya ng umano’y anomalya sa flood control projects.

Ayon sa ulat ng Department of the Interior and Local Government (DILG), pinaghihinalaang may hawak na Portuges na pasaporte si Co na nakuha umano “so many years ago.” “Former Ako Bicol Party-list Rep. Zaldy Co may be in Portugal,” pahayag ni Interior Secretary Jonvic Remulla, na nanawagan sa publiko na tumulong sa paghahanap sa dating kongresista.

Batay sa mga dokumento, kanselado na ang pasaporte ni Co sa Pilipinas, ngunit pinaniniwalaang nakalabas siya ng bansa gamit ang ibang travel document. Dahil dito, nakatakdang makipag-ugnayan ang gobyerno ng Pilipinas sa Portugal sa pamamagitan ng Department of Justice (DOJ), na siyang Central Authority para sa mga extradition requests. 

Ayon sa DOJ, mandato ng kanilang tanggapan na magsilbing kinatawan ng bansa sa mga kasong may kaugnayan sa extradition at mutual legal assistance.

Sa ilalim ng Presidential Decree 1069 o Philippine Extradition Law, maaaring hilingin ng Pilipinas ang pormal na pagsuko ng isang akusado mula sa ibang bansa kung may kasong kinahaharap ito sa korte. Ang proseso ay magsisimula sa provisional arrest na maaaring tumagal ng hanggang 60 araw habang inaayos ang kumpletong extradition papers.

Si Co ay iniimbestigahan kaugnay ng umano’y budget insertions sa flood control projects na nagdulot ng bilyong pisong anomalya. Ang kanyang pagkawala ay nagdulot ng pangamba sa mga awtoridad na maaaring makatakas siya sa pananagutan.

Sa ngayon, nakikipag-ugnayan na ang DILG at DOJ sa mga counterpart agencies sa Portugal upang masiguro ang pagbabalik ni Co sa bansa para harapin ang mga kasong isinampa laban sa kanya.