DISYEMBRE 10, 2025 — Kinumpirma ni Pangulong Ferdinand Marcos Jr. na kanselado na ang pasaporte ng nagbitiw na kongresista ng Ako Bicol na si Elizaldy “Zaldy” Co, kasabay ng patuloy na pagtugis sa kanya kaugnay ng mga kasong katiwalian.

Sa kanyang mensahe, sinabi ng Pangulo na inatasan niya ang Department of Foreign Affairs at Philippine National Police na makipag-ugnayan sa mga embahada upang matiyak na hindi makakatakas si Co. 

“At kung sakali man ay siya ay pupunta roon, ay i-rereport sa atin para naman maibalik natin siya dito sa Pilipinas,” ani Marcos.

Si Co ay may kinakaharap na warrant of arrest mula sa Sandiganbayan dahil sa umano’y maanomalyang flood control project sa Naujan, Oriental Mindoro. Bukod dito, siya rin ay iniugnay sa mas malawak na kontrobersya sa Department of Public Works and Highways kung saan bilyun-bilyong piso ang sinasabing nawaldas sa mga kickback scheme.

Habang dumarami ang testimonya laban sa kanya, naglabas si Co ng sariling video statement kung saan inakusahan niya si Marcos at ilang opisyal ng umano’y P100-bilyong “insertion” sa pambansang budget. Gayunman, mariing itinanggi ng Palasyo ang mga paratang at iginiit na walang saysay ang mga ito hangga’t hindi siya humaharap sa korte.

Binigyang-diin ng Pangulo na nagpapatuloy ang imbestigasyon sa mga iregularidad sa mga proyektong imprastraktura. 

“Asahan po ninyo na patuloy pa rin ang ating imbestigasyon, patuloy pa rin ang ating pagpila ng mga kaso upang tiyakin na ang mga guilty dito sa ganitong klaseng iskandalo ay haharap sa batas, at bukod diyan ay maibalik ang ninakaw na pera sa taong-bayan,” aniya.

(Larawan: Presidential Communications Office)