Setyembre 20, 2025 – Bumaba sa ika-37 puwesto ang Gilas Pilipinas sa pinakabagong talaan ng FIBA World Ranking matapos ang kanilang pagkadismaya sa nakalipas na FIBA Asia Cup na ginanap sa Saudi Arabia.

Mula sa dating ika-34 na ranggo noong Nobyembre 2024, bumagsak ng tatlong baitang ang pambansang koponan ng Pilipinas matapos ang serye ng pagkatalo laban sa matitinding karibal sa rehiyon. Sa naturang torneo, natalo agad ang Gilas laban sa Chinese Taipei, na sinundan ng isa pang kabiguan kontra New Zealand. Bagama’t nakapagtala sila ng panalo laban sa Iraq upang makapasok sa qualification round patungong quarterfinals, hindi pa rin ito naging sapat upang maituloy ang kanilang kampanya.

Ang pagbagsak ng ranggo ay nagdulot ng pagkabahala sa mga tagahanga at eksperto ng basketball, lalo na’t kilala ang Pilipinas bilang isa sa mga bansang may pinakamalaking suporta at pagmamahal sa naturang isport. Ayon sa ilang sports analyst, malaki ang epekto ng kawalan ng consistency ng Gilas at ang paulit-ulit na pagbabago ng lineup sa kanilang overall performance.

Maguugunitang noong nakaraang taon ay nakapagtala pa ng makasaysayang panalo ang Gilas laban sa New Zealand sa FIBA Asia Cup Qualifiers na ginanap sa Pilipinas, dahilan upang umakyat sila noon sa ika-34 na ranggo. Subalit hindi na nila napanatili ang momentum na ito at mas umangat ang ibang bansa sa Asya tulad ng Chinese Taipei na naging hadlang muli sa kanilang pag-usad.

Samantala, nananatili namang nasa Top 10 ang mga powerhouse teams gaya ng United States, Spain at Australia, na patuloy na naghahari sa pandaigdigang basketball rankings.

Tiniyak naman ng Samahang Basketbol ng Pilipinas (SBP) na hindi sila titigil sa pagtutok sa programang pang-nasyonal upang makahanap ng mas matatag na sistema at estratehiya para sa mga susunod na kompetisyon. Isa sa mga nakikitang hakbang ng organisasyon ay ang pagpapatuloy ng naturalization process para sa ilang manlalaro at ang mas maagang paghahanda ng koponan bago sumabak sa international tournaments.

Para sa maraming fans, nananatiling mataas ang pag-asa na muling makababalik sa dating lakas ang Gilas, lalo’t papalapit na ang mga qualifying games para sa iba pang FIBA-sanctioned tournaments. Sa kabila ng kasalukuyang ranggo, umaasa ang sambayanang Pilipino na maibabalik ng koponan ang kanilang tikas at ipapakita muli ang tunay na galing ng Pinoy basketball sa world stage.