MANILA, Philippines — Tinalakay ng mga senador nitong Lunes ang panukalang amyendahan ang Republic Act No. 9344 o Juvenile Justice and Welfare Act of 2006 upang ibaba mula 15 taon patungong 10 taon ang minimum age of criminal liability para sa mga menor de edad na sangkot sa heinous crimes.

Ayon sa panukala na inihain ni Senador Robinhood Padilla, mananagot sa batas ang mga batang edad 10 hanggang 17 na makakagawa ng mabibigat na krimen tulad ng murder, rape, parricide, infanticide, kidnapping na may kasamang homicide o rape, destructive arson, carnapping na may kasamang kamatayan o panggagahasa, at high-level drug offenses. Sa kasalukuyang batas, ang mga menor de edad na wala pang 15 taon ay hindi maaaring kasuhan at isinasailalim lamang sa intervention o rehabilitation programs.

Sa panukalang amyenda, ang mga menor de edad na hindi sangkot sa heinous crimes ay patuloy na idadaan sa community-based rehabilitation programs sa ilalim ng pangangasiwa ng mga social worker. Nakatuon ang panukala sa mga seryosong kaso habang pinapanatili ang rehabilitative approach para sa mas magaan na paglabag.

Ipinahayag ng ilang child rights advocates at mambabatas na ang pagbaba ng age threshold ay maaaring lumabag sa international child protection standards na karaniwang mas mataas ang minimum age of criminal responsibility. Binabalaan din na maaari nitong mailagay ang mga batang mahina ang kalagayan sa mas mabigat na kondisyon ng adult justice system na posibleng magdulot ng pangmatagalang stigma.

Binanggit din ng ilang eksperto na limitado ang kapasidad ng mga juvenile rehabilitation centers at kailangan munang tugunan ang ugat ng mga krimeng kinasasangkutan ng kabataan tulad ng kahirapan, pang-aabuso, at kakulangan sa edukasyon. Naniniwala silang mahalaga ang pagpapalakas ng rehabilitation programs at community-based interventions upang mabawasan ang juvenile crime.

Ang panukala ay isasailalim pa sa karagdagang pagdinig sa Senado, kung saan kukunin ang opinyon ng mga child welfare advocates, legal experts, law enforcement, at iba pang kaugnay na ahensya ng gobyerno.